Diabierna mainta Corte di Husticia a trata e caso penal cu Ministerio Publico a cuminsa contra e homber Haitiano biba na Aruba, S. (32), kende ta wordo acusa di a droga y viola un mucha muher di 15 aña.
SOLO DI PUEBLO por a compronde cu Fiscal a exigi 54 luna di prison pa e homber S., kende a pidi disculpa na e mama di e hoben cu tabata presente den sala di Corte.
ACUSACIONNAN
E acusacionnan cu Fiscal a presenta contra S. ta cu el a droga y viola un dama hoben M. (15) y a haci actonan inmoral cu M. Esaki a sosode dia 27 Februari 2025.
SOSPECHOSO TA NENGA
Hues a bisa cu segun raport di Polis, S. a palabra cu dos otro hende, un homber S. y e dama hoben M. pa bay beach. Ta sospecha cu e dia ey anochi a sosode cosnan cu no ta permiti caminda S. a viola e mucha muher M. Hues a puntra S. kico a sosode. Segun S., e dia ey el a conoce e homber S. y e dama M. El a pidi e homber S. instagram di M. El a bisa cu e homber S. y e dama M. a huma marihuana na beach.
Hues a corta S. den su declaracion y a puntra, si S. tabatin relacion sexual cu e dama M. Segun S., el a baha e homber S. na cas y el a hiba M. El a bisa cu e dama M. a bisa cu e no kier bay cas awor. Nan a bay beach bek y a tene relacion. Segun S., e no a forza e dama M. haci nada. El a bisa cu ta e dama M. mes a haci movecion pa tin relacion sexual. Segun S., e dama M. a cuminsa yora y a bisa S. cu den pasado el a wordo abusa di un otro homber. Segun S., el a bisa M. pa bisa su mama of yama Polis. M. a bisa cu e no a bisa su mama. Despues di tabatin relacion sexual, el a hiba M. su cas.
VIOLACION DI MUCHA
Hues a bisa cu esey ta e banda di medaya di S. pero si evalua henter e caso, tin preguntanan! Hues a bisa cu dia 28 Februari 2025 marduga, M. tabata na Insam na San Nicolas bou influencia di droga hunto cu e homber S. Hues a mustra cu e homber S. a bisa cu otro cos a sosode. Segun M., nan a dun’e hopi bebida alcoholico y el a haya un blackout. Despues di cu S. a baha e homber S. na su cas, S. a sigui duna M. alcohol y el a haya blackout. Ora el a spierta, el a ripara cu e tabata den un camber y S. para su dilanti. Segun M., el a cuminsa grita ora cu S. a mishi na su parti intimo.
Hues a sigui bisa cu na Insam M. a conta kico a sosode y investigacion medico ta mustra cu M. a wordo abusa y tabatin un herida na su pia. Segun M., el a sufri herida na pia ora cu e tabata lucha cu S.
SOSPECHOSO NO KIER PAPIA
Hues a remarca cu ta hopi straño cu S. ta bisa algo y e dama M. ta bisa otro cos. Segun S. loke M. a bisa no ta berdad. El a para riba cu tur cos a sosode voluntario. Hues a puntra S. pakico e tabata kier e Instagram di M. Hues tabata haci preguntanan skerpi na S. entre otro si e tabata haya M. bunita y si e tabata kier tin relacion cune.
Ta asina cu S. a bisa cu ta e homber S. tabata kier a bay beach. Hues a remarca cu S. no kier bisa nada. El a mustra cu e homber S. a bisa cu e tabata intermedia entre S. y M. Hues a sigui bisa cu e homber S. a declara cu el a bisa S. cu M. tin 15 aña. Apesar di esey, S. lo a insisti. Hues a mustra cu S. lo a manda mensahe pa M. cu e por ta un secreto entre nan dos. Na opinion di Hues, tur esaki ta mustra cu S. tabata kier tin relacion cu M.
Segun S., e no tabata kier tin relacion cu M. Hues a remarca cu ora M. a brasa S., S. no a bisa cu no, sino a tene relacion cu M. Hues a bisa cu e homber S. a bisa cu el a ripara cu S. tabata kier tin algo cu M. Ora el a baha na su cas, e tabata duna M. señal pa baha cun’e pero M. a keda den e auto. Mas o menos 12’or di anochi, S. a yama M. y a scucha M. ta yora. E ora ey M. a bis’e cu S. tabata kier penetr’e cu su dede. S. tabatin mal pensamento cu esaki. Despues ta resulta cu M. a bay Insam y bisa cu el a wordo viola. Ta asina cu for 3 November 2025, S. ta encarcela.
SOSPECHOSO TA PIDI DISCULPA
Na dado momento S. a bisa Hues cu ta duel e hopi loke a sosode. El a pidi disculpa na e mama di e mucha y na su señora. E señora y e mama di S. tabata yora den sala di Corte. Hues a bisa cu e caso aki ta hopi lamentable y ta un drama pa tanto e famia di M. y famia di S. Hues a bisa cu Reclasering a recomenda cu si ta duna castigo combina pa S. sigui un curso special riba abusa di mucha.
FISCAL TA EXIGI 54 LUNA DI PRISON
Fiscal a bisa Hues cu ta un hecho cu S. a tene relacion sexual cu M. E pregunta ta si aki tabatin forzamento y si M. a perde conocemento. S. ta para riba cu e no a forza M. Fiscal a bisa cu M. a bisa cu e homber S. tabata dun’e bebida alcoholico cada rato. Despues ora a baha e homber S. na cas, S. a sigui dun’e bebida y el a haya un blackout. Ora el a spierta e tabata den un apartamento y a sinti dolor pasobra S. tabata penetr’e cu su dede. Segun M., el a lucha cu S. y a sufri un herida na su pia. Fiscal ta haya e declaracion di M. confiabel. El a bisa cu S. a admiti di tabatin relacion sexual cu M. Fiscal a mustra cu e homber S. a bisa cu S. a cumpra un boter di bebida fuerte pa nan bebe. Fiscal ta haya cu tin suficiente prueba di sosten. El a mustra tambe cu na Insam a haci investigacion cu ta mustra cu M. a wordo viola. Fiscal a mustra cu S. mes a bisa cu ora e tabatin relacion cu M., M. a cuminsa yora. Fiscal ta haya S. culpabel di violacion y actonan inmoral. E ta haya cu S. a droga M. pa asina abusa di dje. Fiscal a remarca cu apesar cu e homber S. a bisa S. cu M. tin 15 aña, S. a planea pa duna M. bebida pa asina abusa di dje. Fiscal ta haya cu S. a tacha e integridad di M. Fiscal a exigi 54 luna (4 aña y 6 luna) di prison di cual 6 luna ta condicional cu 3 aña di prueba.
ABOGADO
Mr. Kock a bisa Hues cu e caso ta di lamenta y cu S. a bisa cu ta duel e loke a sosode. E abogado a bisa cu ta solamente e famianan a keda afecta. El a bisa cu ta promer biaha S. ta cay den man di husticia. El a bisa cu e pareha di S. ta pasa momentonan hopi dificil pa mantene e yiunan.
E pareha di S. no por a contene su mes mas y a sali for di sala di Corte.
Hues a bisa cu e ta bay studia e caso y 29 Mei 2026 lo dicta sentencia.
