Awe mainta, Corte di Hustcia a trata un caso grandi di importacion di mas di 400 kilo di droga haya na Vader Piet. Tratamento di e caso a dura te den oranan di atardi. Un total di 6 sospechoso, e mayoria Venezolano, a presente dilanti Hues.
SOLO DI PUEBLO por a compronde cu Fiscal a baha pisa riba e grupo. E persona cu ta wordo considera e coordina, Fiscal a exigi 8 aña di prison.
E sospechosonan den e caso aki, cu ta hiba e nomber “Mazurca” ta e hombernan Venezolano: O.M.D.(40), J.A.N.(42), J.M.L.(30), I.C.A.(30), J.A.S.(31) y e Arubiano G.A.E.(51).
Fiscal ta acusa e grupo di ta envolvi den importacion di cocaina y marihuana entre 17 y 19 Juli 2024, caminda 423 kilo di marihuana y 1.9 kilo di cocaina a keda confisca. Fiscal a bisa cu e sospechoso J.A.N. tambe ta wordo acusa cu entre 13 December 2023 y 15 December 2023 a importa 235 kilo di cocaina y 238 kilo di marihuana. Fiscal a acusa G.A.E. cu riba 23 Juli 2024, tabatin un cantidad di pildernan XTC den su poder.
BULTONAN DI DROGA HAYA NA VADER PIET
Hues a mustra cu segun e raport di Polis, dia 19 Juli 2024 na Vader Piet banda di e molinanan di biento, Polis a bin haya 15 bulto di droga. En total tabata 423 kilo di marihuana y 1.9 kilo di cocaina.
Investigacion a resulta na detencion di e grupo aki. Hues a mustra cu Polis a keda vigila e beach y dia 20 di Juli 2024 a detene e hombernan O.M.D. y F.R. na e beach. O.M.D. tabata scondi den algun baranca mientras cu mas leu a bin haya F.R. ta cana. Den Corte M.D. ta desmenti di ta envolvi den e caso pero Hues a confront’e su declaracion na Polis. O.M.D. lo a bisa Polis cu el a bin ilegal cu boto. F.R. lo a declara cu e tambe a bin cu e boto y cu nan tabata busca droga riba beach.
Hues a puntra J.A.N. si e ta envolvi. J.A.N. a nenga di tabata envolvi. Hues a mustra cu na Polis J.A.N. a declara cu un conoci di dje na Colombia a pidi’e pa busca hende na beach cu lo a bin cu boto. J.A.N. a percura pa J.A.S. y J.M.L. a bay na e beach pa busca.
POLIS A USA APARATO SPECIAL PA SCUCHA TUR COS
Segun J.A.N. e tabata na parke Arikok banda di Palo Marga, pa busca un hende cu lo a bin cu boto for di Colombia. Pero nunca e persona aki a bin. Hues a bisa cu Polis a pone aparato pa scucha combersacion den e auto di J.A.N., kende nan tabata vigila pa un tempo caba. A scucha combersacionnan tocante droga. Dia 17 di Juli 2024 a scucha J.A.N. tabata papia cu: “awe ta e dia di biento. Esey lo yuda pa e cosnan yega tera. Lo mester warda riba e cosnan”. Dia 18 Juli 2024 den oranan di marduga, J.M.L. lo tabata warda na beach pa e cosnan cu lo a wordo tira den laman. Hues a sigui bisa cu G.A.E. a declara na Polis cu J.A.N. tabata e intermediador pa e droga yega. Ta asina cu e homber F.R.(Maracucho) tambe a bisa asina na Polis. Hues a mustra cu investigacion ta mustra cu J.A.N. a huur un Jeep pa core riba beach. Hues a bisa cu I.C.A. a declara cu mester a paga mas di 1 mil florin pa e Jeep.
Hues a sigui cu J.M.L., kende ta nenga cu e ta envolvi. Sinembargo Hues a mustra cu tin combersacionnan scucha entre J.A.N. y J.M.L. Esaki tabata riba 17 Juli 2024, caminda J.A.N. ta bisa J.M.L.: “awe ta e dia di biento”. “Awe nos mester haci’e”. “Pero no tin biento”. Ta papia di cu lo bin 6 cos y tur hende lo haya 3 y J.M.L. lo haya 4. Tambe cu J.A.N. a bisa cu J.M.L. lo bende facil y J.M.L. a bisa cu e no ta bay bende e porqueria ey. Hues a mustra cu tin combersacion caminda J.A.N. a bisa J.A.S. y J.M.L. pa bay busca riba beach. Por a nota cu ora Hues a confronta nan cu e combersacionnan aki, ningun no a bisa nada.
Hues a bisa cu G.A.E. a declara na Polis cu e conoce J.A.N. El a bisa cu e ta usa droga y a paga J.A.N. 1200 mil dollar pa 5 liber di marihuana. G.A.E. a declara na Polis cu J.A.N. ta e intermediador di e traficacion di droga. El a bisa Hues cu e saco cu XTC cu a haya na su cas, ta pa su propio uso. El a bisa cu e marihuana cu el a paga pa haya, ta pa propio uso y su hendenan cu sa bin serca dje, cu e sa yuda cu un poco marihuana.
BULTONAN DI DROGA SCONDI NA GRAPEFIELD
Ta acusa J.A.N. tambe di a importa 253 kilo di cocaina y 238 kilo di marihuana, riba 15 December 2023 na e beach na Grapefield. Ta asina cu J.A.N. a nenga categorico dilanti Hues. Hues a remarca na J.A.N. cu segun e raport di Polis, dia 13 December 2023, Guarda Costa a haya informacion cu tin un boto cu lote grandi di droga biniendo Aruba. Ariba radar a mira un boto chikito lo tabata bandonando Aruba. A haci investigacion banda di Rincon caminda a haya 3 salba bida. A haya 3 ilegal ta cana y nan a bisa cu nan a bula for di boto. A sigui investiga y bao di algun mata a bin haya cantidad di bultonan di droga.
Relacion cu esaki, Polis a instala aparato special pa scucha combersacionnan den e auto di e sospechoso homber L. Asina a bin scucha L. ta papia cu J.A.N. dia 15 December 2023 mainta. Nan tabata papia di mercancia cu a yega tera, cu tin Polis y toco toco. Polis ta sospecha cu “toco toco” ta significa, helicopter di Polis. Polis a scucha J.A.N. ta papia di un Jeep y cu cantidadnan cu lo a yega costa y cu e hendenan abordo mester bisa cu nan ta ilegal. Tambe cu mester kita e cantidadnan for banda di costa. Ta asina cu na Polis, J.A.N. a bisa cu e no ta declara nada.
FISCAL A BAHA PISA
Fiscal a bisa Hues cu e hecho cu Polis a instala aparato special den auto di J.A.N., a yuda cu investigacion. Esaki a sosode, despues cu Polis a haya informacion di plannan di traficacion di droga.
Fiscal a bisa cu dia 19 Juli 2024, Polis a haya e bultonan di droga na Vader Piet y un dia despues a detene 2 di esnan di J.A.N. cu tabata na beach pa mira si ta haya e bultonan. Fiscal a remarca cu e yamadanan cu Polis a scucha ta mustra cu for di Juni 2024, J.A.N. tabata papia di e importacion y a menciona nombernan. Tambe Polis a scucha J.A.N. bisa cu lo laga un Jeep hiba hendenan pa busca e bultonan. Fiscal a bisa cu algun di e sospechosonan mes a bisa cu ta J.A.N. a manda nan. Fiscal a bisa cu e ta considera J.A.N. e coordinador di e importacion.
Fiscal ta considera J.A.N. e coordinador di e importacionnan y a exigi 8 aña di prison. Pa O.M.D. el a exigi 4 aña y 6 luna di prison, pa J.M.L. el a exigi 2 aña y 8 luna di prison, pa I.C.A, el a exigi 2 aña y 6 luna di prison, pa J.A.S. el a exigi 4 aña di prison.
Fiscal a bisa Hues cu e no ta haya G.A.E. complice di e importacion di droga y ta pidi pa declar’e liber. Fiscal ta haya G.A.E. culpabel di posecion di XTC. El a exigi 4 luna di prison y a pidi Hues pa lag’e liber.
Hues awor lo bay studia e caso y dentro di algun siman lo dicta sentencia.
