Dia 24 di juni 2023 S.V. Sport Boys ta celebra su tradicional Fiesta di Dera Gay riba Dia di San Juan. Esaki ta di 62 aña ta organisa e fiesta cultural aki, den su forma original y alaves celebra su 65 aña di existencia.
E celebracion lo cuminsa 5:00 di atardi. Di 5:00 te cu 7:00 pm lo tin Cah’i Orgel Mi Adorada di Chido Marin y Grupo di Baile bao direccion di Madeline Kelly.
Di 7:00 te cu 9:30 pm Grupo Stimami lo anima e Baile di Bandera, Matamento di Gay.
E persona cu logra Mata e Gay ta bira e heroe di e anochi aki y mescos cu esun cu haya e Bandera di San Juan ta ricibi nan premio. Pa 9:30 lo tin Baile di Wals.
Pa 10:00 pm ta sigui cu un fiesta bailabel bao encargo di “Grupo di Betico” cu un bon repertorio musical pa anima e fiesta te den marduga.
Un y tur ta keda invita pa bin celebra hunto cu e pueblo di Santa Cruz Pariba e Celebracion di San Juan na Sport Boys Club situa na Angochi.
Entrada ta un sonrisa, bar y cushina ta bon surti. Tambe lo bai tin tentnan di Obra di Man, Cos Dushi y Benta obra di Habon.
