Recien Corte di Husticia a trata e caso penal cu Ministerio Publico a cuminsa contra e hoben homber C.H.(18). E ta wordo acusa cu riba 19 Juni 2024 a purba mata, door di tira riba un auto y herida un dama.
SOLO DI PUEBLO por a compronde cu Fiscal a exigi 7 aña di prison pa C.H. mientras cu abogado mr. Hernandez ta haya cu C.H. a actua den defensa propio pasobra e chofer homber den e auto a dirigi arma riba C.H.
PROBLEMA DEN BENDEMENTO DI DROGA
Hues a puntra C.H. kico a pasa riba 19 Juni 2024. C.H. a bisa Hues cu e tabata cu un amigo L. y nan a subi den un auto Toyota cu un homber na stuur y un dama Hulandes n abanda. Nan a bay banda di stadion di Dakota y eynan lo a surgi problema den bendemento di marihuana. E homber na stuur a saca arma pa C.H. y L. y bisa nan baha for di auto. Cu arma riba nan, e homber a coy placa for di carson di C.H. Ora e tabata kier a drenta auto bek, L. a pone pia cu a strob’e di drenta. A surgi un luchamento y C.H. a coy su placa y a core bay hunto cu L.
TIRAMENTO
E homber a bay den su auto, sali for di pakinglot di e stadion y bay tras di C.H. y L., cu tabata cana banda di e casnan banda di stadion. Segun C.H., e auto a para banda di nan y e homber a baha e glas di auto y pone arma riba dje. E ora ey C.H. a coy su arma y tira.
Hues a bisa cu pa casualidad tabatin un patruya di e unidad di narcotica para banda di stadion y e agentenan a mira den un caya un homber a baha sin flanel for di un auto Toyota y dos otro cu flanel. Ta asina cu C.H. y L. tabatin flannel bisti. E agentenan di narcotica a mira cu e dos hombernan cu flanel a lucha cu esun lomba sunu y despues esun lomba sunu a subi e auto y core bay tras di C.H. y L. Segun C.H. ta el a core bay. Polis a mira e chofer den auto bay tras di C.H. y L. cu tabata na altura di un cas. Na dado momento Polis a scucha un tiro.
E auto Toyota a core bay duro y C.H. y L. a core bay na pia. Hues a bisa cu den e auto tabatin un dama Hulandes, D., sinta banda di e chofer y e dama a resulta herida na su man.
C.H. a bisa cu el a tira riba e chofer y no a pensa cu e bala lo alcanza e dama D.
Hues a bisa cu for di un camera di seguridad na un cas a mira imagennan net na e banda di chofer di e auto y no por mira nada cu e glas tabata baha. Hues a bisa cu straño ta cu ningun hende sa kende ta e chofer di e auto. C.H. e dia ey tabatin 2 mil florin y e homber a kita esaki for di dje. Despues di e luchamento, C.H. a coy su placa for di e homber. Ta asina cu ora Polis a detene C.H., e no tabatin e arma cun’e. C.H. a bisa cu ora el a core bay, el a laga e arma cay.
Hues a mustra cu e dama D. cu a wordo herida, a bisa Polis cu ta C.H. y L. a lucha cu e homber y ranca tas for di dje. Hues a mustra tambe cu e amigo di C.H., L. a bisa cu e homber a kita placa for di dje. L. tambe a bisa cu e no a mira cu e homber lo a saca arma for di e auto. C.H. a bisa Hues cu e homber a bisa nan cu pa regla e asunto aki, nan tur dos mester a sali for di auto y e homber a kita placa for di dje.
FISCAL A EXIGI 7 AÑA DI PRISON
Fiscal a bisa cu dia19 Juni 2024 mas o menos 2’or di merdia, 2 miembro di team di narcotica a mira con dos hoben cu flanel ta lucha cu un homber lomba sunu y despues nan a core bay. E homber lomba sunu a subi su auto y core nan tras. No mucho leu, a scucha tiro. E dos hobennan tabata patras den auto y a sali. Fiscal a remarca cu esaki ta otro cu loke C.H. a declara. E agentenan a bisa cu nan a mira C.H. ta core cu un revolver den man. Na opinion di Fiscal, camera di seguridad ta mustra cu ningun momento e glas di e auto, en especial na parti di chofer, a baha. Fiscal a sigui bisa cu C.H. a tira riba e auto y herida e dama Hulandes D. na man. C.H. a tira dirigi y esey a causa cu e dama D. a resulta herida. Fiscal ta considera esaki, cu C.H. a purba mata. Na opinion di Fiscal, C.H. a tuma e risico cu un hende ta resulta herida door di a tira riba e auto. Esey a sosode tambe. Fiscal ta haya legalmente proba cu C.H. a purba mata e dama D. y un homber cu a keda desconoci. Fiscal ta haya cu den e caso aki no por papia cu C.H. a actua den defensa propio. Fiscal ta haya C.H. culpable di posecion di un revolver Caliber 38.
Fiscal a bisa cu e tiramento a sosode den cercania di schoolnan. El a remarca, kico lo a sosode si e tiramento a sosode algun rato promer ora cu muchanan tabata sali for di school pa bay cas. Fiscal ta haya cu pa posecion di arma di candela so ta 2 aña di prison. Door di a tira den direccion di hende tin castigo di 6 pa 8 aña. Den e caso aki ta trata di un hoben(18) y ta promer biaha cu e ta cay den man di husticia. Di otro banda ta C.H. a dicidi di cana arma. Fiscal a exigi 7 aña di prison.
HOBEN A ACTUA DEN DEFENSA PROPIO
Abogado mr. Hernandez a reacciona riba e exigencia di Fiscal di 7 aña di prison pa su cliente, e hoben C.H.(18). E abogado a bisa Hues cu C.H. a actua den defensa propio y mester declara declara C.H. liber. E abogado a bisa Hues cu con por ta imposibel cu C.H. a tira riba e auto y e glas no a kibra. Esey ta mustra cu e glas di auto tabata habri y no manera cu ta bisa cu e glasnan di auto tabata sera. Tambe e abogado a bisa cu e dama D. no kier bisa Polis kende e homber ta. E ta haya cu Polis no a haci investigacion completo.
El a pidi Hues pa tene cuenta cu ta promer biaha cu C.H. ta cay sera. E abogado a bisa cu ta duel C.H. loke a sosode y cu C.H. ta dispuesto pa cay bou guia di Reclasering. El a pidi Hues pa aplica ley hubenil pasobra 4 luna promer, C.H. tabata 17 aña. E abogado a bisa cu C.H. su mama a fayece y C.H. kier bay Hulanda serca su famia. Si e bay keda hopi tempo sera den KIA, esaki lo perhudica C.H. den su desaroyo.
Hues a bisa cu e ta bay studia e caso y dia 14 Maart 2025 lo tin sentencia.
