Awe mainta Hues di Corte di Husticia, a dicta sentencia den e caso penal cu Ministerio Publico a cuminsa contra Izak Principaal.

   SOLO DI PUEBLO por a compronde cu Hues a confirma e exigencia di Fiscal cu ta 9 aña di prison y cu Principaal tin cu sigui tratamento obligatorio den un institucion na Hulanda (TBS).

EXIGENCIA DI FISCAL

Fiscal durante tratamento di e caso dia 15 September 2022 a bisa cu e ta haya Principaal culpabel. Na opinion di Fiscal, e seriedad di e casonan ta mustra cu ley hubenil no ta haci husticia pa tur loke Principaal a haci. Anterior Fiscal a exigi 11 aña di prison pero despues di a haya e relato di e psycologonan, a exigi 9 aña di prison y TBS. TBS ta nifica tratamento obligatorio den un institucion na Hulanda.  

SENTENCIA

Hues via video conference a duna sentencia a sosode. Principaal tabata den un oficina na KIA mientras cu den sala di Corte tabata presente e abogadonan di Principaal y Fiscal. Tambe tabata presente famianan di e victima Sharury y e tata.

-Hues a bisa cu dia 30 December 2019, Principaal a menaza 2 trahador OC. E tempo ey e tabatin 15 aña. Hues a rechaza ponencia di abogado cu Principaal tabata hopi emocional. Hues a bisa cu e abogado a bisa esey pa hustifica defensa propio. Hues ta haya cu no por papia di defensa propio. E ta haya e incidente legalmente proba proba.

-Hues a sigui bisa cu 30 December 2020 e no ta haya proba cu Principaal a menaza di kima cas di su mama. Hues a mustra cu ta solamente declaracion di e ruman so tin. El a declara Principaal liber di esey. Pa loke ta e kibramento di porta, cashi y spiel den cas, mester tin un keho pa asina por persigui un persona. Hues a remarca cu no tin ningun keho di e mama contra Principaal. Pesey mester declara Fiscal no admisibel.

-Hues ta haya legalmente proba cu Principaal tabatin 17.9 gram di marihuana den su poder.

-Hues ta haya e atraco cu violencia hunto cu otronan riba 22 Mei 2021, legalmente proba. El a mustra cu Principaal tabata den auto hunto cu otronan ora a sigui e homber T. E tabata sa cu lo bay horta. Te ora T. a yega su cas, nan tur a baha for di auto. Principaal tabatin un cuchiu, otro cu bate y un cu cuchiu. E homber T. y un otro a wordo atraca cu violencia. Principaal a bay cu e auto di T. y na cas di Principaal a parti e placanan. Esaki Hues ta considera complice di atraco arma cu violencia.

-Dia 30 Mei 2021, e Drive by shooting na American Bar, Hues ta haya legalmente proba. Hues a mustra cu Principaal tabata stuur e auto y Celaire a tira. Hues ta haya cu Principaal tabata sa cu Celaire tabatin e arma y dilanti American Bar, Principaal a baha velocidad y Celaire a tira riba distancia cortico y 4 persona a resulta herida. El a bisa Danki Dios ningun perona no a sufri herida fatal. El a mustra cu ta na cas di Principaal a kita number, pone sticker na e auto. Tur esaki na opinion di Hues ta premedita, o sea a bay prepara pa tira. Esaki Hues ta haya intento di asesinato y cu Principaal ta complice den esaki.  Hues tambe ta haya proba cu Principaal tabatin arma di candela.

-Dia 4 di Juni 2021, Principaal a tira Sharury mata. Hues a bisa cu mescos cu Fiscal, e no ta haya proba intencionalmente a tira pa mata. Pero si e ta haya proba, cu Principaal a coy e arma y pone e arma den direccion di Sharury. Sharury a bisa Principaal pa no haci esey. Na opinion di Hues, tur hende mester sa cu si tin un arma di candela den man y dirigi esaki riba un hende, esaki ta hopi peligroso, si no sa cu tin bala den dje. Polis su investigacion ta mustra cu mester a hala e parti ariba di e loop di e arma patras pa asina e por a tira. Principaal a bisa cu el a saca e peña y a hala e parti ariba di e arma atras. Accidental su dede a primi e gay y arma a tira. Hues a bisa cu e no ta kere cu e stoel a kibra. El a bisa cu Polis no a haya ningun stoel kibra. El a rechaza e ponencia cu ta accidental Principaal a tira. Hues a mustra cu Principaal mester a hala e parti ariba di e loop atras pa asina e por tira. El a haci esaki sin controla si tin bala den loop y si e arma ta riba “safe”. Door cu su dede a primi e gay e arma a tira.

PROBLEMA CU ARMA DI CANDELA

   Hues a bisa cu el a tene cuenta cu e menaza di e dos trahadornan di OC, Principaal tabatin 15 aña. Segun ley mester aplica castigo hubenil. El a tene cuenta cu e tempo cu a transcuri, mas cu 3 aña. Hues a bisa cu e no lo castiga Principaal pa esaki.

   El a mustra cu tin otro hechonan hopi serio, posecion di droga, atraco arma cu violencia hunto cu otro, drive by shooting hunto cu otro, tira Sharury mata, posecion di arma di candela. Hues a mustra cu e victimanan di atraco arma, por keda den trauma. E victimanan di e Drive by shooting tambe. Danki Dios cu no tabatin morto.

Hues ta haya cu e problema di arma di candela ta hopi serio na Aruba. Na opinion di Hues, hende mester por para pafor trankil sin tin miedo cu hende ta pasa tira riba bo.

   E caso Sharury ta hopi tristo. Principaal a laga famianan cu hopi tristeza. Hues a bisa cu den e casonan menciona, Principaal tabatin 17 aña.

USA CASTIGO DI ADULTO

Hues a mustra cu psycologo di Aruba, den su raport ta conseha pa usa castigo di adulto. E psycologo tambe ta haya cu Principaal ta menos responsabel pa su actonan. El a mustra cu e chens ta grandi cu si Principaal no haya tratamento, e lo bolbe cay den mesun cos. Tambe e psycologo a conseha TBS.

   Hues a bisa cu TBS ta un castigo serio. Hopi acusado no kier cay bou TBS. El a splica cu TBS ta nifica cu Principaal mester keda interna den un institucion y haya tratamento obligatorio, te ora cu psychiater determina cu Principaal a recupera. Esey por dura añas.

Hues a sigui bisa cu e psychiater ta haya cu Principaal ta completo responsabel pa su actonan. E ta haya cu e psychiater no a splica esey bon y tambe pa aplica castigo hubenil. E psycologo di Hulanda ta comparti basta punto cu e psycologo di Aruba. Pero e ta recomenda pa aplica castigo hubenil.

   Hues a analisa e raportnan y e circumstancianan bou di cual e incidentenan a tuma lugar. Hues a conclui cu mester aplica castigo di adulto. Tambe el a tene cuenta cu personalidad di Principaal y su actitud den Corte ora di trata e casonan. Tambe el a evalua orientacion di Hof den casonan asina. Hues a remarca cu e tempo ey Principaal tabata bisa riba su mes.

CASTIGO

Hues a bisa cu den caso di atraco cu violencia tin castigo mas cu 4 aña di prison, posecion di arma ta 1 aña, drive by shooting ta mas cu 5 aña. E tira mata di Sharury ta 15 aña. Pa cu e castigo, Hues a tene cuenta cu ta promer biaha cu Principaal ta cay sera. Tambe el a tene cuenta cu e conclusion di psycologo y psychiater. Hues a bisa cu e ta tene cuenta cu Principaal mester di tratamento.

   El a mustra cu Fiscal promer a exigi 11 aña di prison pero despues di a haya e splicacion di psycologonan, a bahe na 9 aña di prison cu TBS.

   Hues a bisa cu e ta confirma exigencia di Fiscal. El a condena Principaal na 9 aña di prison y TBS na Hulanda. Ademas Hues a aproba e demanda di daño di 10 mil florin cu ta e gasto di entiero di Sharury. Hues tambe a aproba 6 mil florin pa daño inmaterial  pa e tata. Tambe Hues a aproba otro daño material pa victima di atraco arma. Den e tempo cu Principaal lo ta sera den KIA, lo mester haci e preparacionnan pa asina e tempo yega e por bay Hulanda pa haya tratamento obligatorio den un institucion.

LEAVE A REPLY

Please enter your comment!
Please enter your name here