Y asina nos ta sigui beurt pa beurt cu nos relatonan semanal, hasi nos dushi hendenan contento cu cosnan riba tereno social-cultural. Danki pa e pasenshi . Awe nos ta relata un crenchi di algun anochi di Poesia cu a tuma lugar den siman den e luna di Augustus, na e hotel cu yama Boardwalk Boutique , situa unda antes Plantage Tromp tawata. Un paraiso scondi mey mey di tur sorto di flora, matanan di fruta y flornan hopi pero hopi berde y bunita cu neishinan di paharito. Nos ta contento cu e gentil hoben adulto responsabel y hopi inspira Brandon Ras di Basha Foundation a invita nos pa bay inspira un grupo di turista na e hotel aki cu nos bunita poemanan. Nos a logra bay dos biaha y a sinti un brisa suave alaves fuerte den amor di emocionnan artistico e anochinan aki, cu participacion di Jennifer “Jen”, Ivy Goeloe, Lady Ruth y Walter Mohamed cu tawata e MC, pero cu tambe a comparti di su bunita poemanan, pa nos trese nos cultura y nos forma di literatura artistico encuanto nos isla mas serca di turista. Pafor, bau di streanan y cu paharitonan cantando prome cu nan bay drumi, dos atardecer super nice mes cu ambiente unico , kere’mi, no ta parse cu ta na Aruba bo ta ! E ta manera un laberinto di naturalesa cu pool meymey. So relaxing !!! Si nos hunga kako scondi boso no lo hanja Lady Ruth nunca !!!
E anochi ta cuminsa 7 pm cu un storia real cortico di nos dushi isla, presenta pa Susana di Boardwalk Boutique Hotel. E prome anochi ela papia di e paharitonan cu nos tin riba Aruba e.o.nos bariga geel y nos trupiaal y mas. E di dos anochi cu Lady Ruth a bay su siguiente siman Susana a papia di nos beachnan, nos santo blanco. Su existencia y su balor. Turistanan den pareha drumi of sinta abao riba un dushi mat cu cushinchinan di color of sinta confortabelmente den stoelnan di tur color, a goza di e storianan aki pa despues e anochi culmina den poemanan recita pa Jen, Ivy, Lady Ruth y Walter. E di dos biaha tawatatin tambe un guitarista femenino cu a toca dos super bunita cancion pone tur hende relaha mas ainda y enjoy the moment. Nos tur a ricibi un dushi treat di un fruitpunch y un snack di personal di Boardwalk cu excelente servicio. Danki na Boardwalk Boutique Hotel y Basha Foundation pa un actividad asina bunita, inspirativo y educativo di un ora pa nos bishitantenan di afor, dunando nan mas informacion di nos bunita y dushi isla. Tawata bunita ora Lady Ruth a combersa cu varios di e turistanan presente na e bunita anochinan aki y a puntra un pareha di Grecia, Griekenland, con nan ta bisa “Mi ta stima’bo” den nan idioma, despues cu nos a sinja nan bisa I love you den nos dushi Papiamento. Den e idioma griego e ta: “Sahapo”. Nos a sinja algo nobo atrobe. Lady Ruth ta conclui su relato di e siman aki cu un saludo hopi caluroso pa sra.vda. Carmen de la Vega Maduro cu tawata e sra. esposa bunita di William “Bill” de la Vega cu ya a bay nos dilanti bastante anja atras. Un cabayero, un ciclista profesional, un artista grandi tempo di su tempo. Mane mi amiga Benita costurera fini profesional ta bisa :”Prohibi pa lubida”. Bill de la Vega ta esun cu a kere den Ruthy durante un fietstocht, con ta bisa, un paseo riba bicicleta di no menos cu 75 km hopi anja pasa, den cual a yega un momento cu nos kier a give up, ta sinti un forsa ta pusha mi sienta di bicicleta bay dilanti pa mi sigui. Tawata nos amigo Bill cu tawata pusha Ruthy y nos a logra corre full e caminda di 75 kilometer. No ta esey so. Bill de la Vega a pinta Ruthy su cara na anja 1988 ( Reken bo som cuanto anja mi tawatatin awor cu mi tin 68 ) cu ta den e colleccion di “Ruthy’s wall of faces”. Esey tawata na Aruba Beach club/Casa del Mar, sinta den e bar area di e hotel despues di a caba di hunga Bingo cu e turistanan ( Nos tawata Social Hostess ).Of ta despues di a hunga volleyball cu e turistanan hoben. Pero nos cara tawata cansa , soda kima di solo cu cabey na halto den un paardenstaart un crenchi bruha di e biento. Ta un di e cuadranan favorito pinta cu potlood of ta charcoal di Lady Ruth den su colleccion di 16 cara pinta durante anjanan den diferente etapanan di Lady Ruth su bida. Contento di a hasi conosi cu beautiful Carmen de la Vega Maduro,(beter laat dan nooit) anto den nos lugar favorito Coffee House ! Danki lieve Carmen pa a share cu nos cosnan bunita di Bill, cu ya pa anjas ta mas serca di nos mente, alma y curason. Exito cu bo bunita proyecto cu bo tin como sorpresa pa Aruba y pa mundo artistico ! Blessings den e bunita trabao pa realisa esaki .
Danki na tur nos lectornan pa lesa nos relato di e siman aki. Un bon dia colma di salud, alegria y sabiduria ! Un “bearhug” diki gordo di Lady Ruth. Y si bo no kier e, mandele bek pa nos !!! (hahahahaha). Gustosamente nos ta habri brasa tumele bek !
