Dilanti di Bestuurskantoor, a tuma luga un ceremonia special pa honra e 65 aña di existencia di AOV (Algemene Ouderdomsverzekering).
E ceremonia a reuni ministernan, invitadonan, empleadonan di SVb y comunidad, mientras cu director di SVb, sr. Edwin Jacobs, hunto cu Prome Minister Mike Eman y Minister Mervin Wyatt-Ras a desvela un borchi pa marca e aniversario significativo aki.
AOV ta un pilar fundamental den nos sistema social, cu ta brinda seguridad, stabilidad y dignidad na nos adulto mayor.
Durante e ceremonia, Minister di Salubridad, Asuntonan Social, Cuido di Adulto Mayor y Maneho di Adiccion, Mervin Wyatt-Ras, a resalta e importancia di AOV como un simbolo di gratitud y respet pa nos grandinan, cu a traha duro pa lanta nos pais.
“AOV ta mas cu un pensioen. Ta un acto di gratitud, di respet y di husticia. E adulto mayor a traha duro pa lanta nos pais. E ora a yega pa nos sigui brindanan e sosten cu nan merece. Nos ministerio ta compromete pa sigui fortalece e base legal y financiero di e sistema, pa cu e por sigui sirbi futuro generacionnan cu mes un dignidad,” segun e Minister.
E 65 aña di AOV ta testamento di con un ley cu a nace for di e necesidad pa proteha esnan mas vulnerabel, por crece y adapta pa sigui duna proteccion social cu balor na tur generacion.
Minister Wyatt-Ras a felicita tur adulto mayor cu ta disfruta di su derecho social y a gradici tur hende cu a contribui den lanta y fortalece e sistema, asegurando un futuro mas sigur pa nos comunidad.
