Diadomingo un di dos delegacion di bombero di e post situa na Aeropuerto Internacional Reina Breatrix, a biaha rumbo pa Jacksonville Florida. Ta trata aki di 14 bombero di Aruba cu a sali pa un curso special di entrenamento di rescate y pagamento di candela principalmente den caso di emergencia na areopuerto. E prome grupo, consistiendo di 16 bombero, recientemente a haci e mesun curso na Florida.
Minister di Husticia mr. drs. Arthur Dowers tabata presente na aeropuerto pa asina mira riba continuidad di un programa cu a inicia algun aña atras ( mas di dies aña pasa), bao mando di comandante De Cuba e tempo ey y cual a sigui haya interes di e cuerpo di bombero.
Na e momento aki ta evalua con e proceso ta bayendo, tin algun adaptacion a tuma luga basa riba e programa cu a culmina algun tempo atras. E curso cu e grupo aki lo ricibi lo ta diferente, cu ta nifica un crecemento y preparacion optimal pa nos hendenan.
Minister Dowers a expresa tambe di ta contento di mira e grado di motivacion di e miembronan di Cuerpo di Bombero. No obstante di kier mira cambio y atencion na cierto puntonan di importancia den e maneho di Brandweer pero e motivacion ta existente y importante.
Ta di admira, cu maske hopi departamento a traha bou di condicionnan dificil, brandweer nan a keda demostra nan positivismo y motivacion, pa garantisa siguridad di pais Aruba, cual Minister ta gradici nan y deseanan tur clase di exito den e training.
