Den un sala completamente yen na Cede di MEP, Lider di Partido MEP y parlamentarionan di MEP a duna informacion riba e “Rijkswet HOFA” cu gobierno a entrega na Conseho di Minister di Reino na Hulanda, sin informa Parlamento.
A elabora riba e historia di e ley di reino, y Lider di MEP a enfatisa cu e dos leynan di reino cu Hulanda kier a forsa Aruba pa acepta, tur dos a wordo bari for di mesa. Kiermen MEP no a mara Aruba na nada.
Tampoco den e acuerdo di 2024, pasobra e acuerdo ey ta manera un menu cu dos opcion. Prome cu el’a baha como Prome Minister, Evelyn Wever-Croes a laga dos opcion atras.
E acuerdo pa paga interes di 6.9%, of un ley di reino pa paga interes mas abou. MEP a sali di gobierno prome cu e escohencia a wordo haci.
E gobierno nobo a negocia y a yega na e opcion di HOFA.
Sinembargo a hasi esaki den tur secrecia, tras di lomba di Parlamento. Esnan presente a condena esaki y ta exigi transparencia di e ministernan Eman, Wever, y Croes.
Locual tur hende ta di acuerdo cune ta cu e autonomia di nos pais ta sagrado y e lucha ta continua. Pero e lucha aki mester hibe cu conocemento y cu argumento.
Un siguiente reunion a wordo yama pa dialuna 8 di september 2025 7.30 pm. Un invitacion ta bai na tur sostenedornan pa acudi na e reunion y trece mas hende pa haya informacion.
Si e Rijkswet ta asina bon, dicon Mike, Gerlien y Geoffrey no kier acepte como nan logro?
