Na juni 2024 ex-Minister Presidente Evelyn Wever-Croes a firma un acuerdo cu Hulanda, e asina yama “Bestuurlijk Akkoord”. Den e Bestuurlijk Akkoord aki ex-Prome Minister, den nomber di Gobierno di Aruba, a acorda cu lo bin un Rijkswet pa regula supervision financiero y tambe cu lo bin un ley local di supervision financiero cu ta reemplasa e ley di supervision financiero actual.
Ora Gabinete AVP-Futuro a huramenta fin di maart 2025, nan a haya un splicacion di e team di profesional cu ex-Minister Presidente Evelyn Wever-Croes a instala pa negocia Rijkswet pa supervision financiero na Aruba. E profesionalnan a splica Gabinete AVP-Futuro cu nan tin mas o menos un aña caba ta negocia y ta den e fase final di yega na un acuerdo cu Hulanda riba e contenido di e Rijkswet y e ley local cu mester reemplasa e ley di supervision financiero (LAFT) cu tin actualmente. Tur esaki nan a bin ta haci bao di instruccion di ex-Premier Evelyn Wever-Croes, basa riba e acuerdo di aña 2024.
Gabinete AVP-Futuro a drenta den dialogo cu Hulanda y laga e team di profesional cu ex-Prome Minister Evelyn Wever-Croes a instala, continua cu e negociacionnan cu tabata 90% cla caba y cu recientemente a yega na su final.
A presenta tanto e Rijkswet como tambe e ley local di supervision financiero na Parlamento di Aruba y tambe a present’e na Conseho di Minister di Reino pa asina inicia un proceso di haya conseho di diferente instancia manera entre otro Raad van Advies y Raad van State, pero mas importante, pa Parlamento di Aruba por revisa esaki y por evalua pa su mes si nan ta di acuerdo cu e rijkswet y e ley local di supervision financiero nobo.
Sin aprobacion oficial di un mayoria den Parlamento di Aruba, e Rijkswet y e ley local di supervision financiero nobo no por drenta na vigor. Awo ta na Parlamento di Aruba pa haci su trabou y ta solamente si un mayoria den Parlamento di Aruba ta di acuerdo, e rijkswet y e ley di supervision financiero local nobo, por drenta na vigor.
Manera por nota, e proceso pa yega na e contenido final di ambos ley, tanto esun di consenso di Reino como esun local, a cana un trayecto largo bou di dos periodo di gobernacion. Hecho ta cu e acuerdo haci pa Gabinete Wever-Croes II cu Gobierno di Hulanda, no ta duna mucho espacio pa e gobierno nobo, Gabinete AVP-Futuro por maniobra y/of adapta of haci cambio. Asina mes den e proceso di negociacion despues di instalacion di Gabinete AVP-Futuro, a logra algun cambio pa a suavisa e areglo y condicionnan cu tabatin riba mesa.
