E impresion cu algun partido di coalicion kier mustra, cu ex-prome minister Evelyn Wever-Croes no a informa Parlamento, ta simplemente incorecto. Dia 7 di september 2023 ex-prome minister Wever-Croes a bin Parlamento den un reunion publico pa trata e refinanciamento di e debe di COVID lening cu Parlamento. Durante e reunion aki Parlamento a presenta 4 mocion cu sigur a forma e cuadro dentro di cual Gobierno di Aruba mester sigui negosha cu Hulanda.
Den mocionnan nr. 3 y 5 cu a keda aproba nos a urgi Gobierno pa sigui negosha y bou ki condicionnan. Den e mocion nr. 4 a instrui Gobierno pa na tur momento salvaguardia nos derechonan democratico y den mocion nr. 7 Parlamento di Aruba a instrui Gobierno pa baha RAft di mesa mirando cu no tin consensus.
Na mei 2024, Gobierno a bolbe bin den Parlamento, den un encuentro publico (openbare bijeenkomst) pa brinda informacion y transparencia y pa pidi pa gevoelens al respecto.
Tambe ta importante pa compronde cu e Bestuurlijk Akkoord no ta un contrato obligatorio. Den e documento ta para cla cla: si yega na un acuerdo, interes ta baha. Si no tin acuerdo, interes ta subi. Esaki ta mustra cu e acuerdo ta un resultado di negosacion, no un obligacion final pa Aruba. Contrario na loke ta trata e Consensusrijkswet HOFA.
Por lo tanto, no ta berdad cu Parlamento a keda poni un banda pa Gabinete Wever-Croes. Lo contrario: Parlamento mes a pone e regla pa negosacion por sigui y bou cua condicion.
