Minister President di pais Aruba mr. Mike Eman cu conviccion a mira e vision fiho refleha den e discurso di Su Excelencia Gobernador Alfonso Boekhoudt, den nomber di Gobierno di Aruba, awe mainta durante apertura di Aña Parlamentario 2025-2026.
Den e presentacion por a scucha e sentimento cu ta biba den nos comunidad, cu un deseo profundo pa reparti e prosperidad cu e comunidad den un forma husto.
No ta un secreto cu nos comunidad a sufri inmensamente bao di un sin fin di medida, caminda cu entre otro a drenta na vigor un aumento di BBO, cu a afecta e costo di bida drasticamente.
Premier Eman a menciona tambe e empobrecimento bisto di e pueblo, cu a hiba na un cambio grandi cu pueblo a scoge p’e, cual a keda vocifera awe durante discurso di Su Excelencia Gobernador.
Meta di mira prosperidad, no unicamente den un grupito/famia, pero uno comparti cu e pueblo, caminda pensionado ta haya su aumento, enfermo y/of adulto mayor ta haya su remedinan y esnan di menos recurso lo ricibi asistencia financiero.
E liña di pensamento, expresa den e sentimentonan durante discurso di Gobernador, cual ta e prosperidad comparti y ta algo cu e Gobierno nobo ta articulando den cada paso cu e tuma.
Pais un biaha mas ta mira proyectonan cu lo bay tuma luga, entre otro renobacion di Bushiri, De Vuijst, MFA San Nicolas y mas y esaki a keda menciona den e discurso di Gobernador awe mainta. Igual ta conta pa e relacion den Reino cu ta desea, cual ta uno strategico, constructivo entre Gobierno di Aruba y Gobierno di Reino.
Un discurso cu tin e comunidad su deseo transmiti aden, di kico kier mira den un Gobierno nobo, guia tambe door di refleccion caminda Fe, speransa y amor ta resalta.
