Den fin di siman Jourdé Klaber, Rachid Erasmus y nan Coach Master Yoshmar Wever a participa den e Presidents Cup na Lima, Peru pa purba gana un wild card pa Pan Americano 2026.
Yoshmar Wever a participa den e technical meeting cu a wordo duna na ingles, sigui pa campeonato di forma “Poomsea”. Dia 6 di September Jourdé Klaber a bringa den e categoria di Adulto di -63 kilo cu un total di 47 participante den e categoria ey. Jourdé Klaber a bringa su prome pelea contra di Lito Godolphin di Merca y Jourdé Klaber a gana 11-1. Despues Jourdé Klaber a topa e Brazilero Kauan Ferreira. Jourdé Klaber a duna di su banda, pero a perde e prome rond 2-0. Den e di dos rond Jourdé Klaber a ataca hopi, pero a bin ta perde e rond 5-4 y por a bay cambia paña numa y sigui wak e otro peleanan.
Dia 7 di September tabata dia di Rachid Erasmus cu a bringa den e categoria di Cadet -37 cu un total di 9 participante den su categoria. Rachid Erasmus a topa cu Juan Pablo Marin for di Colombia.Rachid Erasmus a cuminsa cu su atakenan, pero e Colombiano tabata un cabes mas grandi y hopi mas avansa den su contra atakenan y asina e prome rond a termina 8-0 pa Juan Pablo Marin for di Colombia. Den e di dos rond Rachid Erasmus a bin mas agresivo y a logra 3 punto, pero e Colombiano a sigui mas fuerte cu su contra atakenan y logra su puntonan y asina e di dos rond a termina 9-3 pa e Colombiano.Yoshmar Wever ta satisfecho cu dos atleta di Taekwondo Team Aruba a participa den e Presidents Cup y a logra gana mas experencia. Taekwondo Team Aruba ta gradici na Pueblo cu a cumpra rifa di e Television y na tur automobilista cu a pasa duna algo durante cu e adultonan ta para colecta ariba e brug di Renaissance cu nan permiso pa collect.
