Gerlien Croes y su politica contra maestro
Enseñansa ta futuro di Aruba. Pero awor, futuro ta wordo secuestra. Loke Gerlien a bin ta hasiendo, ta creando un desgusto den e veld. Maestronan ta desapunta di Gerlien. Un serie di decisionnan a wordo tuma pa corta cabes di maestronan, algo sigur cu ta repudiabel.
Salario di maestro: traicion di promer ora
E promer acto di Gerlien como minister di enseñansa tabata pa stop e proceso di aumento di salario. Enebes cu el’a gara e lucha, el’a prefera di culpa su antecesor. Riba prome dia, dia 28 di maart 2025, el’a corta 10% di presupuesto di enseñansa. Un golpi duro contra esnan cu ta traha mas fuerte pa forma nos futuro. Awor, despues cu pueblo y sindicato a halsa vos, e ta bin cu un promesa pa salario, manera si ta un regalo di su banda. Esey no ta respet, eseyta manipulacion politico.
Chauffeur ta gana mas cu maestro
Nos ta biba un realidad absurdo: un chauffeur di minister ta gana mas cu un maestro cu ta forma generacionnan. Esaki ta mustra cla cual ta su prioridad: privilegio politico riba enseñansa.
Cultura di miedo y dictadura
Profesionalnan na SKOA y DPS ta bisa cla: Gerlien no kier dialogo.
E ta grita maestronan, el’a prohibi nan pa papia, y a impone un cultura di miedo. Enseñansa ta basa riba confiansa y respet, no riba intimidacion y dictadura. Tin un caso cu a pasa na scol di Washington, segun fuentenan, unda hasta el’a mete pa cambia decision di norma di puntonan di scol pa laga un mucha bay over. Gerlien, kico bo por alrespecto?
Partido Futuro: nan so kier dicidi
Fundadornan di Partido Futuro ta hinca den tur departamento, den skolnan y den DPS. Nan so kier dicidi, nan so kier dicta.
Nan no tin oido pa e veld, nan no tin respet enseñansa, y inclusive nan no tin respet pa autonomia di nos pais.
Cartel ta cla: Partido Futuro a secuestra enseñansa y ta secuestra nos futuro.
Nos ta reta Gerlien Croes: Sali y bisa si esaki no ta berdad. El’a corta 10% den begroting di enseñansa, despues bisa cu no tin placa pa aumento di salario.
Laga Gerlien nenga cu su chauffeur y otro chauffeurnan di minister ta gana mas cu maestro.
Laga Gerlien nenga cu el’a prohibi profesionalnan pa papia.
Laga Gerlien nenga cu el’a pone un stop na aumento di salario pa maestro
Atraco!
Esaki no ta solamente un atraco riba enseñansa. Esaki ta un atraco riba nos pueblo, nos yiu y nos pais. Maestro, no laga bo voz keda silensia. Enseñansa ta ABO, no nan. Sali y subi caya, defende bo causa, defende bo lucha. Bo merece e aumento di salario. Si bo no move, si bo no lucha, si bo para keto, lo bo mes copera pa laga nan malgasta e placa den nombra henter partido futuro como staatssecretaris: Politico Rondel afl 15.000/ Politco Erasmus afl 15.000 / Diplomatico Cultural bibando na Hulanda afl 15.000 /. Chauffeur cu toelage ta casi afl 8000
Den 2025; Gerlien a corta 3 miyon di salario di maestronan for di tur e scolnan aki:
Scolnan i e cantidad di placa (For di Salario di Docentnan)
1. Anglo School – Afl 100.000
2. Cayenaschool – Afl. 200.000
3. Mon Plaisir College – Afl. 100.000
4. Sint Franciscus College – Afl. 100.000
5. Maria Goretti Afl 100.000
6. Fatima College – Afl. 100.000
7. HeiligHart Afl 100.000
8. Santa Teresita Afl 100.000
9. Mon Plaisire School Afl 100.000
10. Colegio Laura Wernet Afl 100.000
11. Faith Revival Afl. 100.000
12. Duna un Man School – Afl. 500.000
13. La Salle college – Afl. 100.000
14. Maria College – Afl. 200.000
15. Colegio Arubano – Afl. 500.000
16. EPB Afl 500.000
Total Estima di Recorte: Afl. 3.000.000
