Awe nos ta relata algo mas di nos guapo amigo colega artista multifacetico Waldy Simson, naci na Suriname y a biba traha y crea arte bunita aki na Aruba pa 20 anja. Danki na amigo coleganan den prensa pa e publicacion di e poema cu Lady Ruth a skirbi pa Waldy, un bunita poema na ingles titula “My artist friend Waldy”, cu nos por a lesa den Diario e.o. y tambe on line cu Awe Mainta recientemente. Waldy Simson, un bon maestro den wiskunde, rekenen, tekenen y handvaardigheid. Ela duna les na John Wesley College, Maria College, Colegio San Antonio, EPB San Nicolas y tambe na EPB Sta. Cruz. Un bon meneer natural cu curason pa su profesion y pa su arte den tur ramo. Nos ta sigur cu ela toca hopi curason di su alumnonan cu su manera natural di ta, simpel, directo y cu bon atencion pa su alumnonan.
Meneer Simson a traha den Ensenanza na Aruba y a sigui inspira den su talentonan di pinta y crea arte den tur ramo cu e tawata domina bon. E tin mas di 40 anja (43) den e mundo artistico y ta hopi varia den su bunita creacionnan unico. Nos por corda cu Waldy a traha renoba y of a drecha un of mas bentana di glasnan di color di Misa Sta. Anna na Nort. Lady Ruth no tawata conose Waldy ora cu ela cuminsa traha na Aruba, ta despues ela tende lesa y mira obranan traha pa Waldy y a mira tambe e bunita potret saca cu ex-gobernador di Aruba Fredis Refunjol cu un di su bunita obranan. Waldy ta compone cancionnan mas tanto cu e toke spiritual religioso, cu su humilde curason yen di sabidiuria y gradicimento na su Creador di amor pa su bida, su salud, su talentonan. Waldy ta di opinion cu “Bo ta nace un artista” y bo ta sigui desaroya e talentonan artistico cu bo nace cu ne, bo ta expres’e .
Waldy ta inspira y pone riba papel bunita poemanan, mayoria di nan cu e toke spiritual. Su curason ta yen di amor pa su Creador semper y kier a comparti esaki cu tur rond di dje cu hopi alegria. Meneer Simson, alias e artista versatile Waldy a bishita Afrika na 2006 y a entrega un di su bunita obranan artistico, e retrato di papel na e presidente na bida ainda e tempo ey, Nelson Mandela. Ki bunita gesto ! Ki honor ! Ki bendicion ! Nelson Mandela, e South Africa Freedom Fighter a nace dia 18 di juli di anja 1918 y a fayece dia 5 di December di anja 2013. Actualmente Waldy ta trahando full time como artista na su dushi y bunita pais Suriname y a bishita Miami Merca varios biaha como artista. Ela traha un retrato di Martin Luther King e.o. y a traha tambe sculpturanan e.o. esun di un dama yama Michelle. Waldy ta compone of composita musica ariba su piano orgel y tin bukinan di poema publica e.o. “New fruits of the pen of Simson”, y tambe obranan di ceramika, pinturanan riba canvas y mas.
Lady Ruth ta felicita Waldy Simson den nomber di tur di Aruba cu a hanja les di dje, tur cu a conos’e y tur cu a yega di admira su obranan artistico. Danki Waldy, danki Meneer Simson, pa a duna y inspira nos tur cu bo profesion y bo bunita arte. Cu bon Dios sigui drama su bendicion ariba bo, bo famia, bo pais y den tur bo trabaonan bo dilanti cu bo lo sigui crea cosnan bunita y alegra curasonnan rond di bo. Ata aki un poema acrostico cortico cu bo nomber :
W aldy Simson, un cabayero Meneer di scol y Gran Artista
A ruba, bo di dos cas pa 20 anja a sinya hopi for di bo
L amannan di bendicion sigui inspira’bo
D una bon Dios danki pa bo super talentonan comparti
Y mas amor, mas inspiracion bo sigui ricibi
S igui sembra paz na unda cu bo bay y bishita
I nos como poeta artistanan di Aruba, abo nos ta admira
M aestro di scol, Artista versatile multifacetico abo ta
S emper dispuesto di crea algo bunita pa edifica
O ra nos pensa y sinti bo amor den cada obra crea
N os curason tambe ta duna danki pa cada alma inspira !
Ruthy “Lady Ruth”, Aruba, September 2025
