Den Mateo 4:1-11, diabel a aserca Hesus den desierto y kier a negocia cune, bisando cu si bo ta Yiu di Dios, haci locual mi ta bisabo, y Hesus a reprende e diabel bisando; Bay for di akinan satanas, Pasobra ta para scirbi: Adora Senjor bo Dios, y sirbi E so. Y e ora ey diabel a bay laga E, y mira angelnan a bin y a sirbi’E.
Cada biaha cu hende ta persisti den maldad, imoralidad, contra ordenansa y principio di Dios, buscando cierto poder material of spiritual cu no ta di Dios, nan ta bezig ta negociando cu diabel.
Cada biaha cu un persona ta persisti di biba un bida inmoral, sabiendo masha bon cu esey ta bay contra boluntad di Dios e ta negociando cu diabel cual lo hibe dia pa dia mas den scuridad.
Hopi biaha e bida di un hende cu ta necogia cu diabel ta mustra masha bunita, den rikesa , den materialismo, pero su bida ta leu for di Dios, dor di pactonan cu scuridad , cu den final lo caba na destruccion.
Cuanto mandatario of presidente di paisnan rond mundo no ta negocia cu diabel, pa asina keda hopi anja na poder, pero nos tur ta ripara cu semper e tipo di gobiernonan ey ta hiba e pueblo den probresa extremo, pasobra caminda tin idolatria, y negocio cu maldad pobresa ta aumenta .
Ta para scirbi den 2 Timoteo capitulo 3, 4, Efesionan 6 ya bisa cu nos lucha no ta contra carni y sanger, cu den ultimo tempo maldad, bruheria, santeria, y satanismo tambe lo lanta cabes, pasobra hende lo ninga di sigi palabra di Dios, y acepta fabula, cosnan cu ta kishiki nan horea, cosnan cu nan sa bon, cu no ta agrada Dios , y cu ta hiba na locura.
Asina cu palabra di coreccion di parti di Dios, ta pone un hende rabia, palabra di Dios ta pone un hende, bira negativo, berdad ta pone un hende , bira onsportief, y hasta e kier tuma vengansa contra esnan cu ta trece e palabra, mesora bo ta nota presencia di diabel.
Un tempo nos tabata tende di e cosnan aki, awor nos ta mira nan cu wowo cla, tur locual hende kier logra cu no riba un base sano, cu ta bini for di man di Dios, nan ta purba di logra via di man di diabel.
E diabel tambe ta duna cos, pero e ta cobra cu bo bida, si bo no arepenti na tempo y bandona caminda di maldad,
Semper tabatin gruponan y asociacion, cu ta liga cu maldad , of cu satanismo riba mundo, pero awor mas cu nunca, awor cu e binida di Cristo ta serca nan manifestacion ta birando bisto cada dia mas, y tin homber y muher ta cay den nan trampa, keriendo cu ta sabi nan ta pero ta bao di dominio di maldad nan ta.
Un ladron ta pensa cu nunca polis lo gara e, un bendedornan di droga ta pensa cu e lo bende droga y bira rico, y cu su rikesa y poder lo ta pa semper, pero nos tur sa cu hopi di nan cu a laga diabel ganjanan a paga cu nan bida,of ta pasando mayoria parti di nan bida den prison.
Sea sobrio, sea alerta, boso adversario e diabel , ta cana rond manera un leon, manera un leon cu ta grunja, buscando ken e por devora.(1 Pedro 5;8).
Tene cuenta cu ora nos ta biba cu falta di pordon, yena cu rabia, y buscando vengansa nos ta negociando cu diabel. Ta tempo pa laga los.
Sinceramente, Pastor Marcel Balootje
