Den su prome bishita oficial na Hulanda, Prome Minister mr. Mike Eman ta atendiendo un cantidad di reunion cu personanan prominente den politica Hulandes. un di e reunionnan aki a tuma luga cu ex Prome Minister Jan Peter Balkenende cu ta un amigo di Aruba pero tambe personal di Eman, pesey cada bes cu Eman, den cualkier capacidad ta na Hulanda, ta traha espacio den su agenda pa topa cu Balkenende y contempla riba Hulanda, riba mundo y riba retonan dilanti tur comunidad.
Prof. mr. dr. Jan Peter Balkenende tin un trayecto impresionante y ademas di tabata ex Prome Minister, e ta carga e titulo honorario di Minister di Estado, y cu apenas 21 aña e tabata Gemeenteraadslid. Ademas e ta conta cu un respet enorme den arena politico Hulandes y Europeo.
Durante su encuentro e biaha aki cu Balkenende, Prome Minister Eman a intercambia di pensamento riba e manera pa acerca e gobierno nobo despues di eleccion proximo pa por yega na acuerdonan enfocando riba oportunidadnan win-win pa tanto Aruba como Hulanda. Ademas a papia di Universidad di Wageningen, di kenniseconomie pero tambe riba e idea pa crea un fondo di inversion pa e islanan Aruba, Corsou y Sint Maarten pero cu por inclui e islanan BES tambe. Na luga di haci pago na Hulanda pa e Covid-lening, kier haci e mesun pago pero na e fondo di inversion cu por uza pa inversionnan necesario pero tambe crea un buffer pa por enfrenta cualkier posibel calamidad riba e islanan di Caribe Hulandes.
Balkenende a comparti varios idea con pa acerca e politiconan Hulandes cu e diferente proyectonan y a accepta e invitacion pa un conferencia grandi riba e tema di “E bon comun”. Esaki lo ta un conferencia cu invitadonan cu ta profesor, y filosofico y personahenan cu ideanan practico riba e tema di e bon comun. Rond mundo Gobiernonan ta busca con por traduci e pasonan cu nan ta tuma den resultado mas concreto pa e ciudadano y con por dirigi e decisionnan cu Gobiernonan ta haci den direccion di sirbi e bon comun. Hopi biaha tin un disconexion entre locual Gobiernonan ta haci y locual e pueblonan ta sinti, pero tambe den sector priva den cual e trahadonan no tur ora ta sinti cu nan esfuersonan ta traduci den un miho prosperidad. Ta crucial pa reflexiona riba e bon comun y ta importante pa sa unda mester trece cambio pa alinea e desaroyo cu e bienester di comunidad.
Ya tin confirmacion di Professor Sandel di Harvard University cu tin experticio amplio riba e tema di e bon comun y lo comparti su conocemento durante e conferencia na final di januari 2026. E conferencia aki lo conta cu un line-up di experto riba e tema aki cu mester sirbi como guia pa nos mehora e bon comun na Aruba.
Prome Minister Eman ta satisfecho cu e aporte intelectual di ex Prome Minister Balkenende pa locual ta haciendo na Aruba. Premier Eman ta buscando un base solido pa carga e rumbo cu kier hiba Aruba aden y ta contento cu por conta cu sosten di institutonan Hulandes. Ta hustamente pa e motibo aki, un bon relacion cu Hulanda ta importante.
