Canasta Basico tin como meta regula e prijsnan di productonan di Canasta Basico cu consumidor ta paga. Minister di Finansa Geoffrey Wever ta informa tur luna Departamento di Asuntonan Economico ta publica e lista di prijsnan maximo di 1330 producto den e Canasta Basico. Tur demas producto cu no ta forma parti di canasta basico, companianan mes ta pone e prijs sin intervencion di gobierno.
E Canasta Basico ta consisti di e siguiente 19 categorianan di producto:
| ArosBaby foodKoffieTeHariña di maishiLechi koffieLechi polvoAzeta pa cushina | Frozen broccoliFrozen spinachFrozen mixed vegetablesCanned tuna fishCanned sardinesDried beansCanned salmon | All purpose flourSpaghettiOatmealUHT milk |
Cada 19 categoria tin producto di diferente marca, peso, contenido y paketamento. Por ehempel den e categoria di Aros tin 34 diferente marca di aros cu un total di 186 diferente producto, e categoria di Koffie ta consisti di 47 diferente marca di koffie cu un total di 196 producto. E categoria di Lechi Polvo ta consisti di 18 diferente marca di lechi di polvo cu un total di 76 producto. Gobierno ta regula e prijs di 19 categoria di producto di diferente marca, peso, contenido y paketamento.
Regulacion di prijsnan di producto y servicio ofreci riba mercado ta regla den e “Prijzenverordening”. Articulo dos di e ley aki ta duna e minister di Asunto Economico e autoridad pa regula prijsnan di productonan y servicio cu ta wordo ofreci riba mercado cu e meta pa proteha interes publico.
Pa determina e prijsnan di tur productonan den e Canasta Basico, companianan tin cu entrega nan facturanan na Departamento di Asuntonan Economico. Basa riba e documentonan entrega , Departamento di Asuntonan Economico ta calcula e prijs maximo cu ta inclui e margen di ganashi pa e companianan na cual e productonan por wordo bendi.
E margen di ganashi por mayor – groothandelsmarge- ta 7 porciento pa azeta pa cushina, 9 porciento pa aros, baby food, hariña di maishi, te, koffie, lechi koffie, lechi polvo, canned tuna fish, canned sardines, dried beans, canned salmon, all purpose flour, spaghetti, oatmeal, UHT milk y 13 porciento pa frozen broccoli, frozen spinach y frozen mixed vegetables.
E margen di ganashi por detaye -kleinhandelsmarge- ta 10 porciento pa azeta pa cushina, 13 porciento pa aros y hariña di maishi, 14 porciento pa te, koffie, lechi koffie, lechi polvo, canned tuna fish, canned sardines, dried beans, canned salmon, all purpose flour, spaghetti, oatmeal, UHT milk y 15 porciento pa frozen broccoli, frozen spinach y frozen mixed vegetables.
Cambio den prijsnan di productonan den e canasta basico ta e resultado di factornan externo manera cambio den prijs internacional di e productonan, cambio den gasto di transporte y cambio den wisselkoers. E margen di ganashi ta pa garantiza un prijs maximo cu consumidornan ta paga. Esaki no no ta un garantia cu importacion di e productonan den canasta basico ta un negoshi rendabel.
E prijzenverordening ta duna gobierno e autoridad pa determina e prijs maximo pa productonan di prome necesidad. Si facturanan entrega pa companianan ta mustra un subida, of bahada of ningun cambio den prijs internacional di e productonan, cambio den gasto di transporte y cambio den wisselkoers, calculacion y publicacion pa Departamento di Asuntonan Economico lo mustra esaki tambe segun minister Geoffrey Wever.
Pa mas informacion riba e prijsnan di productonan den Canasta Basico por bishita e website www.deaci.aw
