Durante e siman di reunionnan den Hulanda, Prome Minister di Aruba, mr. Mike Eman, a sostene un combersacion fructifero cu Joeri van Dun, consehero den transicion energetico, tecnica y ehecusion social.
Van Dun a expresa su aprecio pa e dialogo constructivo cu Premier Eman, unda a discuti e trayectoria y planificacion nobo di gobierno y e ehecusion di su vision pa un Aruba mas sostenibel.
Joeri van Dun no ta un cara nobo pa nos isla. Entre 2014 te 2018 el a traha den organisacion Hulandes pa tecnologia industrial (TNO), unda el a biba y traha na Aruba y contribui den diferente proyecto tanto na nos isla como den region Caribe.
TNO na Aruba, un branch di e organisacion Hulandes, ta dedica na busca solucion di energia sostenibel. Estableci na Oranjestad, TNO a hunga un rol clave den transicion energetico pa energia di biento y solar algun aña areas. Nan trabou ta inclui investigacion y desaroyo pa mehora eficiencia energetico, reduci dependencia di combustible fosil y contribui na meta pa Aruba bira un isla completamente sostenibel.
Van Dun a enfatisa cu energia sostenibel pa Aruba no a perde impulso, y cu nos isla tin hopi potencial pa logra su meta, usando recursonan natural y avansenan tecnologico disponibel.
E reunion tambe a keda marca pa e participacion di Alexandra Sizoo, consehero juridico y di transicion energetico. Pa Sizoo, e combersacion cu Prome Minister Eman tabata sumamente interesante y un oportunidad pa intercambia conocemento. Den su opinion, Aruba por siña hopi di Hulanda y vice versa, cu un modelo di cooperacion local y regional.
Sizoo a subraya cu tin spacio pa amplia e colaboracion no solamente entre Aruba y Hulanda, pero tambe cu islanan den region Caribe. Cu su experencia amplio riba energia sostenibel, Sizoo ta dispuesto pa yuda logra un sistema energetico sostenibel y duradero no solamente pa Aruba sino pa den Caribe Hulandes.
Prome Minister Eman a expresa su satisfaccion cu e reunionnan y e compromiso pa sigui traha riba un caminda energetico mas berde y resistente pa futuro di Aruba.
