Durante un bishita na Hulanda, Prome Minister di Aruba, mr. Mike Eman, a tene un dialogo importante cu lider di CDA, Henri Bontenbal. E reunion a consolida un laso di amistad y cooperacion cu ta existi ya pa hopi tempo entre Aruba y CDA, un laso basa riba respet, confiansa y un compromiso comparti pa futuro di Reino.
E encuentro a habri espacio pa trata temanan vital cu ta toca tanto Aruba como Hulanda: proteccion di naturalesa, fortalecemento di turismo sostenibel, investigacion cu Universidad di Wageningen, y tambe un enfoke mas amplo riba bienestar social y economico.
Premier Eman a expresa cu den e relacion cu CDA, Gobierno di Aruba ta mira un guia y inspiracion pa temponan turbulento cu mundo ta pasando aden. Liderato di Bontenbal, segun Premier Eman, ta basa riba normanan y balor cu ta duna stabilidad y speransa, tanto pa Hulanda mes como pa Aruba y demas islanan den Reino.
Eman a enfatisa cu Aruba ta busca constantemente pa amplia e cooperacion den Reino, no solamente riba base di idea racional, pero tambe riba un sentido profundo di comunidad y amor pa proximo. Segun Premier Eman, esaki ta precisamente e cualidadnan cu CDA y su lider Bontenbal ta demostra: un liderato cu ta carga speransa, stabilidad y un fuerte compromiso humano.
Gobierno di Aruba ta contempla e reunion cu Bontenbal como un paso strategico pa fortifica posicion di Aruba den Reino, y pa sigura cu nos pueblo por sigui avansa den un futuro sostenibel, husto y yen di oportunidad.
