Caribbean Mercantile Bank (CMB) N.V, CEDE ARUBA hunto cu Institute for Good Governance & Leadership (GG&L) di Universidad di Aruba, a organisa cu gran exito e Heart + Knowledge: Non-Profit Leadership & Governance Conference 2025 na Hyatt Regency Aruba.
E evento a reuni mas cu 100 representante di organisacionnan non-profit na Aruba, pa un dia di inspiracion, enseñansa y colaboracion. E conferencia tabata dedica na fortifica liderato y bon gobernansa den sector non-profit, cu un enfoke riba transparencia, sostenibilidad y innovacion.
E programa a inclui presentacionnan di nivel internacional, regional y local. E participacion a demostra un gran interes y compromiso di nos comunidad non-profit pa sigui profesionalisa y fortalece nan rol vital den sociedad.
Ora nos NGO’s ta mas fuerte, henter comunidad ta gana. E conferencia a mustra cu liderato, integridad y transparencia ta fundamental pa logra un Aruba mas resistente y inclusivo.
E input di e sesion interactivo lo wordo usa pa elabora un programa pa continua cu e desaroyo di un NGO Academy na futuro.
E Non-Profit Leadership & Governance Conference 2025 a confirma cu pasion (Heart) y conocemento (Knowledge) ta e combinacion clave pa logra impacto sostenibel. Caribbean Mercantile Bank ta agradeci CEDE ARUBA y Universidad di Aruba pa e colaboracion bunita y mas importante, tur organisacionnan non-profit cu a tuma parti den e evento uniko aki.
