Durante e ultimo dia di e Interparlamentair Koninkrijksoverleg (IPKO) na Hulanda, delegacion di AVP a expresa satisfaccion cu e manera e sesionnan a desaroya den un spiritu di cooperacion, respet y compromiso pa fortifica lazo diplomatico den Reino Hulandes.
E reunionnan di e ultimo dianan a mustra cla cu tur pais — Aruba, Corsou, Sint Maarten y Hulanda — tin boluntad pa traha man den man riba bienestar di nos comunidadnan. Delegacion Arubano a destaca cu e dialogonan profundo, e presentacionnan di experto y e intercambio continuo di idea ta contribui pa fortalece tanto nos institucionnan parlamentario, como e unidad den Reino.
Dialuna mainta tur delegacionnan a haya un audiencia oficial cu Su Mahestad Rey Willem Alexander den Palacio Noordeinde. Durante e encuentro, a trata topiconan di interes comun, enfocando riba desafio actual y oportunidad futuro den area di educacion, desaroyo economico, sostenibilidad y bienestar social.
Segun presidente di comision di asuntonan di Reino y exterior señora Jennifer Arends-Reyes, e audiencia tabata un momento significativo pa reafirma cu nos monarca ta sigui tene un rol central como simbolo di unidad y stabilidad.
Despues di e audiencia, un conferencia di prensa a tuma lugar caminda a anuncia, entre otro, cu e proximo IPKO lo tuma lugar na Aruba den luna di februari 2026. Den esaki, tanto Arends-Reyes como Presidente di Parlamento, señor Marlon Sneek, a dirigi palabra, resaltando e punto di acuerdo mas relevante di e conferencia cu a caba di culmina.
T’asina cu durante e dianan di e encuentro a logra consenso riba tema crucial manera educacion vocacional y oportunidad pa hobennan den Reino, discusion riba sostenibilidad financiero y transparencia gubernamental, y necesidad di sigui enfrenta hunto e retonan global manera cambio climatico y vergrijzing (embehecemento).
A reconoce cu, a pesar di diferencia di contexto y prioridad, tur pais ta comparti un meta comun: un Reino fuerte y husto caminda progreso no ta keda solamente na cifra, sino ta refleha den bida diario di nos pueblo.
Delegacion di AVP a conclui cu optimismo, subrayando cu IPKO ta mas cu un reunion formal; e ta un plataforma cu ta fortifica confianza, crea solucionnan comparti y reafirma cu solamente hunto, den unidad y respet, nos por sigui traha pa un futuro sostenibel y prospero pa henter Reino.
