Departamento di Agricultura, Cria y Pesca Santa Rosa a bin ta premira e situacion di awa di dam for di algun luna caba. Hopi di nos productornan local ta depende riba e awa di dam cu nos di Santa Rosa ta hasi entrega cu nos trucknan. Pero den e dianan aki por a cuminsa tuma nota cu awa di dam ta cabando. Nos a haya berdad poco awa cu a yobe lunanan pasa pero toch asina mes esaki no tabata suficiente pa por yena e damnan pa nos por cumpli cu nos clientela di awa di dam. E demanda pa awa di dam ta keda halto pero mester ta realistico tambe cu si Aruba no haya un torencial awasero y yena e damnan ta dificil pa por cumpli cu nos entrega di awa. Nos ta den un clima cayente y den e ultimo dianan aki tin un calor y temperatura ta halto cual ta hasi tambe cu na momento cubo ta muha bo matanan esaki ta evapora masha liher mes. Nos ta spera cu den e proximo dianan nos dilanti of lunanan caminda cu poco awa por cuminsa yobe cu mas frecuencia pa por logra yena e damnan pa asina nos por haya awa pa nos productornan por muha nan cultivo.

Departamento di Agricultura, Cria y Pesca Santa Rosa ta hasi un apelacion pa tene na cuenta na tur nos clientela cu ta pidi trucknan di awa cu den e dianan aki nos no ta tumando pago pa e servicio di entrega di awa di dam pa motibo cu nos no por cumpli cu e demanda mientrastanto cu no tin awa. Nos ta compronde e situacion cu tur hende ta depende riba esaki pa por minimalisa e uzo di awa di WEB Aruba NV pero otro nos no por hasi. Ban spera cu e temporada nos dilanti por ta mas alentador pa asina trece poco awasero y nos por continua cu nos servicio di entrega di awa di dam na nos clientela.

Hasi Dam limpi
Ta momento tambe pa Departamento di Agricultura, Cria y Pesca Santa Rosa tuma e oportunidad pa mira e posiblidad pa hasi e damnan limpi. Esaki tambe tin su rekesitonan cune. Motibo ta cu berdad e dam por ta sin awa pero dado caso cu tin lodo den e fondo esaki ta dificulta nos trabounan pa hacie limpi. Pero esaki ta trabounan cu lo bai wordo evalua pa por mira cua si por wordo hasi limpi y cua no. Esaki sigur lo yuda cu na momento cu por tin un torencial awasero e dam por retene mas cantidad di awa. Mas awa e dam retene mas nos departamento por cumpli cu nos clientela di truck di awa di dam. Pesey un biaha mas nos ta hasi un apelacion na nos clientela pa tene na cuenta cu no tin sufiente awa di dam y ta pa e motibo ey nos no ta tumando pago pa e servicio na e moemntonan aki.
Nos ta gradici di antemano pa e comprencion