Diabierna 3 October 2025, e homber G.E.T.(40) lo mester presenta dilanti Hues di Corte di Husticia, pa duna cuenta na Hues di e acusacionnan serio cu Ministerio Publico tin contra dje.

   SOLO DI PUEBLO por a compronde cu ta sospecha G.E.T. di a viola ley di droga riba 24 December 2024 y cu dia 26 December 2024, el a causa morto di e homber Terence D’Aguiar.

GULIDO DI BOLITA A MURI

E caso aki mester a tuma lugar na Juni 2025 hunto cu e acusado J.M.Z., pero riba peticion di abogado mr. D.Croes di G.E.T., a pospone e caso. E acusacion di Fiscal contra G.E.T. ta cu riba 24 di December 2024, el a viola ley di droga y dia 26 di December 2024, el a causa morto di e homber defunto Terence D’Aguiar.

   Durante tratamento di e caso contra J.M.Z. ta sali na cla cu G.E.T. ta esun cu a pidi D’Aguiar bay busca bolitanan di cocaina na Medellin, Colombia. Hues a mustra cu e amiga di D’Aguiar a declara na Polis cu G.E.T. a papia cu D’Aguiar. J.M.Z. a bisa den Corte, cu G.E.T. a pidi’e pa bay Medellin, Colombia y pa controla D’Aguiar. J.M.Z. a bisa Hues cu el a bay haci compras di regalo pa famia y tabata vigila D’Aguiar. El a splica cu den pasado a sosode cu D’Aguiar a bay caba Medellin pero door di usamento di droga, el a perde riba caya. Mester a manda hende bay busca D’Aguiar na Medellin.

   Segun J.M.Z., el a bin Aruba cu D’Aguiar pero e no sa nada di gulimento di bolitanan. Segun e relato di Polis, dia 26 di December 2025, Polis a haya informacion cu un hende a muri cu bolitanan di cocaina den stoma. A rsulta cu ta D’Aguiar a bira malo y a fayece. Investigacion a mustra cu 2 bolita di cocaina a kibra den su stoma.

   J.M.Z. a declara na Polis cu G.E.T. a yam’e y bis’e cu D’Aguiar a fayece. Relaciona cu e caso aki, Polis a bay na cas di G.E.T. y a deten’e y tambe J.M.Z.

HUES A SUBI CASTIGO PA COMPLICE

Den e caso contra J.M.Z., Fiscal a mustra cu den pasado J.M.Z. a yega di haya castigo di prison pa asunto di droga. Fiscal ta haye culpabel y a exigi 18 luna di prison. Na Juli 2025, Hues a dicta sentencia contra J.M.Z. Hues a bisa cu e ta haya e caso excepcional pasobra D’Aguiar a fayece cu bolitanan den su stoma.

   Hues ta haya cu J.M.Z. a haci e viahamento pa placa y no a responsabilisa su mes pa loke a sosode. Na opinion di Hues, e castigo exigi pa Fiscal ta mucho abao y a condena J.M.Z. na 2 aña di prison. Diabierna awor lo haya sa kico ta e castigo cu Fiscal lo bay exigi pa G.E.T.