Ora nos ta trata otro bon cu respet, cu amor, nos ta cumpli cu locual Dios ta bisa, cual ta stima Dios riba tur cos y stima bo prohimo manera bo mes.
Ta un sentimento hopi dushi ora bo por demostra atencion, na bo prohimo, mescos cu abo kier atencion, ta algo cu awendia ta bayendo for di moda, pasobra hopi ta pasa riba otro, sin sikiera bisa un bon dia, y tin hende ora bo saluda nan , nan ta keda manera stranjo, cu tin hende ta saluda nan.
Pero tur esey ta bini di e amor di Dios , cu ta biba den nos, y cu ta pusha nos pa haci bon cu otro.
Un mandamento nobo Mi ta duna boso,pa boso stima otro,y mescos cu Ami a stima boso,pa boso tambe stima otro. Na esaki tur hende lo sa cu boso ta mi disipel, si boso tin amor un pa otro.( Juan 13:34-35).
Awendia hopi hende no kier haci un fabor na otro, pasobra nan ta bisa “mi no ta mucha manda di ningun hende” esey ta nifica cu bo no por spera mi yudansa.
Wow esey ta haci dolor especialmente , ora cu ta trata di un hende grandi cu tin mester di atencion.
Pesey e palabra di Dios ta bisa: Laga tin den boso e actitud aki, cu tabatatin tambe den Cristo Hesus.
( Filipensenan 2:5).
Nos no por wak nos propio interes solamente , sino tambe tene cuenta cu interes di otro nan , pasobra esey ta haci hende sinti bon, asina nan curason ta wordo alegra.
Tin hopi mayor no ta tene cuenta cu nan yuinan, y tin hopi yuinan cu no ta tene cuenta cu nan mayornan, pero esey ta bini for di locual a wordo sembra den nan for di chiki.
No ta bon pa laga un mucha riba su mes, y bisa cu ta mucha grandi, e ta, djis pa abo cu ta hende grandi hanja chens di haci cos di mucha, yegando cas tur dia laat y sin pone debido atencion na bo yuinan.
No ta tur ora mester sali cu mucha, y bay come fastfood, pero bo palabra, bo atencion, bo amor, un tiki harimento, ta alegra e mucha su curason, y ta aumenta su confiansa, sabiendo cu abo tin atencion, pe y asina e tambe ta keda cu atencion pa bo.
Laga amor ta sin hipocresia, Aborece loke ta malo,tene firme na loke ta bon.Stima otro cu amor fraternal, duna preferencia na otro den honor,no flakia den diligencia,ma sea ferviente den spirito,sirbiendo Senjor, regosihando den speransa, perserverando den tribulacion, dedika na oracion, contribuyendo na e necesidad di e santonan, practicando hospitalidad.
Ora cu coronavirus a drenta mundo henter, hende a wordo separa for di otro, pa motibo di e virus, pero esey no ta nifica cu hende tin cu keda separa for di otro y comberti nan mesn den famia digital, cu tur cos awor ta bay via telefon y via di app, pasobra den tur e cosnan ey e amor di prohimo no ta sali pa otro.
Awor cu e Dios di perserverancia y di encurashamento, concede pa boso ta di acuerdo cu otro segun Cristo Hesus, pa di un acuerdo, boso den un solo bos, por glorifica e Dios y Tata di nos Senjor Hesus Cristo.
Dios kier pa nos tur biba bon cu otro, pone asunto di hipocrecia y dos cara un banda, stima otro cu amor berdadero, aparta di materialismo, aumenta den fieldad y respet pa otro.
Asina nos ta desmostra cu nos stima otro.
Sinceramente, Pastor Marcel Balootje
