No tene miedo di wordo critica, no tene miedo di hende, pero mantene temor di Dios, pasobra na final di cuenta ta na Dios tur hende mester duna cuenta.
Semper ora bo kier haci algo cu ta bon, na bienestar di hende, especialmente na esnan di menos recurso, critica ta bini, pero usa e critica como piedra di fundeshi, pa asina fortalese locual cu bo ta haciendo.
Cristo Hesus a wordo critica, pa locual cu e tabata haci , e tabata sana y libera hende y e critica tabata bini cu e ta hacie riba dia e cu e tabata hacie , asina ta cu si ta bon bo ta haci, sigi haci, pasobra no tin dia special pa haci bon , tur dia ta dia di haci bon, no worry pasobra critica tambe ta contribui na crecemento.
Palabra di Dios ta bisa den Colosensenan 3:23: Tur loke boso haci, haci boso trabao di curason, como pa Senjor y no pa hende, Sabiendo cu for di Senjor boso ta ricibi e e recompensa di e herencia. Ta Senjor Cristo ta Esun cu boso ta sirbi.Pasobra esun cu haci malo , lo ricibi e consecuencia di e maldad cu e a haci, y esey sin distincion di persona.
No worry si bo wordo critica, pasobra e karakter y pensamento di hende a cambia,hende ta menosprecia bondad, y nan ta halsa maldad y inmoralidad.
Nos ta bibando den tempo trabahoso, y mas awor cu tur cos ta wordo copia, y no lubida con Hesus a bisa den Mateo 24 cuanto falsedad lo aumenta, nos mester tene bon cuenta cu locual nos ta apoya, y den kico nos ta kere, pasobra maldad di berdad a aumenta.
Den e buki di Nehemias, Nehemias kier a drecha e muraya di Jerusalem, y oposicion a lanta, contra dje, pasobra no ta tur hende kier mira bondad, no ta tur hende por soporta cambio positivo,ni den cosnan material ni den bida humano di hende, y hopi biaha e oposicion ta bini di fuente cu bo no a spera.
Pero Nehemias confiando den Dios a vence tur menosprecio y a caba cu e trabao, Nehemias a bisa cu e trabao di Dios ta asina importante, pa e baha for di e muraya, y bin atende cu critica y amenasa.
Nos ta bibando den un mundo caminda hende ta gusta balota otro, caminda tur pregunta ta wordo haci for di unda e placa lo bini, pero locual hende no ta compronde cu Dios ta sostene tur locual ta di dje, tur locual ta duna gloria na Dios, Dios ta sostene. Sea e ta chikito of grandi, Dios Su man ta den dje.
Corda cu palabra di Dios ta bisa cu nos ta e obra di Su man , crea den Cristo Hesus pa bon obranan, cualnan Dios a prepara di antemano pa nos cana den nan.( Efesionan 2:10). Bo tin balor den bista di Dios.
Kico nos por bisa di e cosnan aki anto? Si Dios ta cu nos, ken por ta contra nos? ( Romanonan 8:31).
No lubida cu den Marco 9:21-23 Hesus mes a wordo balota, ora e tata di e mucha demonia a bisa Hesus,si bo por haci algo, tene compasion cu nos y yuda nos.Hesus a bise” Si bo por” Tur cos ta posibel pa esun cu ta kere.
Boso ta di Dios yiu chikitonan, y boso a vencenan, pasobra mas grandi ta esun cu ta den boso, cu esun cu ta den mundo. ( 1 Juan 4:4).
Dios nunca ta laga esnan cu ta kere y spera den dj’E bandona
Sinceramente, Pastor Marcel Balootje.
