E hombernan Venezolano J.B.R., J.P.G., A.H.A. y R.J.G., a presenta den Corte pa scucha nan sentencia. Hues a haya nan culpabel di posecion di un gran cantidad di droga.
SOLO DI PUEBLO por a compronde cu Fiscal a exigi 7 aña di prison pa e grupo cu e ta haya cu a importa droga. Hues no ta haya cu nan a importa droga pero si cu nan tabatin e lote grandi di droga den nan poder. Hues a condena nan na 5 aña di prison.
Luna pasa tratamento di e caso a tuma lugar caminda Fiscal a mustra cu Guarda Costa a intercepta e boto dia 23 Februari 2025. A confisca 23 bulto di droga. Den e bultonan aki a haya 468 kilo di marihuana y 104 kilo di cocaina.
Fiscal a exigi pa cada un sospechoso 7 aña di prison. Tambe el a exigi pa e boto cu 12 jerry can di gasoline keda confisca.
HUES A BAHA CASTIGO
Diabierna mainta, Hues a dicta sentencia den e caso aki. Hues a bisa cu e ta haya legalmente proba cu e grupo aki tabatin un lote di droga. Hues a mustra cu e abogado a bisa cu tabatin fayonan haci y mester declara Fiscal no admisibel. Hues ta rechaza esaki. Hues a bisa cu e ta haya cu tur e 4 acusadonan a wordo hiba cu cara tapa pa un boto cu 572 kilo di droga.
Hues a bisa cu e boto ta chikito y mirando e cantidad di droga, e 4 acusadonan mester por a e cantidad di droga. Hues ta haya cu e 4 acusadonan mester por tabata sa cu tin un carga ilegal abordo. Na opinion di Hues, biniendo Aruba cu e boto, e acusadonan a tuma e chens cu nan ta forma parti di transporte di droga.
Pa cu e castigo, Hues a bisa cu mirando e cantidad di droga, esaki tabata destina pa bende. Droga ta bay compaña cu criminalidad. Hues tambe a tene cuenta cu ta promer biaha cu e grupo aki ta cay den man di husticia.
Hues a sigui bisa cu e ta tene cuenta tambe cu den Corte, e grupo a laga mustra cu nan no sa di nada y no kier a tuma responsabilidad.
Hues a bisa cu e no ta haya proba cu e grupo tabata importa droga sino cu e grupo tabata den posecion di e cantidad di droga.
Hues a condena cada un na 5 aña di prison, kitando e tempo cu nan ta sera den KIA.
