Tin un nubia di mal influencia ta pasando rond y hopi hende no ta nota esey, pero di berdad e ta presente. Awor mal influencia por wordo combati , door di entrega nos bida completamente na Cristo Hesus, asina nos por tin un bida oracion, cual ta comunicacion cu Dios , Kende por libra nos di tur mal influencia.
Ora nos ta mira accidente ta tuma lugar pa motibo di buracheria, crimen ta tuma lugar pa motibo di rabia y falta di pordon. Tanto inmoralidad y malicia cu tin den aire nos tin cu compronde e atake di mal influencia cu ta bay rond.
No ta pornada e palabra di Dios, ta bisa pa nos sea sobrio , sea alerta pasobra boso adversario e diabel ta cana rond manera un leon cu ta grunja, buscando ken e por devora.( 1 Pedro 5:8).
No ta pornada e palabra di Dios ta bisa; Somete boso mes na Dios, resisiti e diabel y e lo huy for di boso. Hala serca Dios y E lo hala serca boso.( Santiago 4:7-8)
Ta para scirbi den Mateo 26:41: Keda vigila y haci oracion, pa boso no cay den tentacion, e spirito ta boluntario, ma e carni ta debil.
Ta kico mas tin cu sosode pa hende cuminsa nota e berdadero necesidad di Dios, den nan bida,pasobra awor mas cu nunca nos ta mira cu nos relacion cu Dios mester ta berdadero, cu nos no ta biba pa religion, pero pa relacion cu Dios.
E ladron ta bini solamente pa horta, pa mata y pa destrui, Ami ta bini pa nan tin bida, y pa nan tine na abundancia.(Juan 10;10).
No ta tempo pa haci wega cu maldad, pasobra nos ta bibando den tempo trabahoso, caminda un cos chikito por bira algo grandi, ripara con un tiki alcohol y droga por causa un accidente grandi, y hasta cu morto.
Un amistad sin dominio propio por hiba na infieldad matrimonial, y asina causa inmoralidad, adulterio, y perdida di famia y tur otro cos.
Un bida influencia pa mentira, por causa danjo cu ta dificil pa drecha den un famia, pasobra mentira ta haci hende iresponsabel.
Wak cuanto accidente ta tumando lugar, pasobra te ainda hende no kier kere cu e presencia di diabel ta real, y e ta bini pa destrai hende for di e palabra di Dios, y esun cu no ta busca Dios, ta cay den su trampa.
Nos tur ta vulberabel pa atake di mal influencia, pesey nos mester tin un bida dedica na Dios, caminda Cristo Hesus ta na prome lugar den nos curason, pa asina nos wordo libra di tentacion.
Lesa bon kico e palabra di Dios ta bisa y sea alerta no ta tempo pa drumi, ta tempo pa ta lanta y firme den Senjor:
E hustu ta un guia pa su prohimo,ma caminda di e malbadonan ta haci nan cana dwaal.( Proverbionan 12:26).
No laga ningun hende ganja boso: Mal compania ta danja bon custumber.( 1 Corintionan 15:33).
Esun cu anda cu hende sabi, lo ta sabi,ma un companjero di hende bobo lo sufri danjo.(Proverbionan 13:20).
Bandona e presencia di un hende bobo, sino lo bo no diserni palabranan di conocemento (Proverbionan 14:7).
Ma awor mi ta scirbi boso pa no asosia cu ningun hende cu ta ruman pa nomber,si e ta un hende inmoral,of golos pa placa,of un adorado di Dios falso, of un blasfemador, of un burache,of un estafador,pa ni come mes hunto cu un hende asina.( 1 Corintionan 5:11).
Ta di berdad cu nos mester mantene un bida dedica na Senjor.
Sinceramente, Pastor Marcel Balootje.
