Miembro di Parlamento sr. Dangui Oduber, a bolbe entrega dos peticion formal na Presidente di Parlamento sr. Sneek y Presidente di comision di turismo, sra. Arends-Reyes. E peticionnan ta pa yama reunionnan di comision cu AHATA y cu Minister di Turismo, sr. Cicilia, pa brinda atencion urgente riba e situacion y falta di regulacion di vacation rentals na Aruba.
Segun Oduber, Aruba ta enfrentando un problema serio di escasez di vivienda, mientras terenonan pa hende cu kier traha of cumpra un cas ta hopi limita y tereno nan na benta ta practicamente impagabel pa nos localnan. “E situacion na Aruba a bira insostenibel. Mientras famianan local ta lucha pa yega na un lugar pa biba, tin cientos di cas cu ta wordo uza pa vacation rental sin control ni regulacion,” asina Oduber a remarca.
Parlamentario Oduber, como ex-Minister di Turismo, a recorda cu durante su periodo a traha riba e Landsverordening instelling Aruba Quality and Hospitality Authority (AQHA), un ley cu mester regula e sector di vacation rentals y establece un autoridad pa supervisa esaki.
“Gobierno y Parlamento anterior y actual ya a reconoce cu regulacion ta necesario. Como ex-Minister di Turismo mi a bin ta traha riba e ley pa controla y regula vacation rentals y ultimo un mocion a wordo aproba den Parlamento riba e tematica aki. Pero te cu awo, nos no a ricibi niun informacion di Minister Cicilia con esaki ta canando. Nos mester proteha e mercado di vivienda y sigura cu turismo ta sigui crece den un manera sostenibel na bienester di nos localnan,” Oduber a agrega.
Nos ta mira con tur luna pa aña 2025 grado di ocupacion di hotelnan ta sigui cay, mientras gobierno ta keda man cruza sin actua pa introduci regulacion pa vacation rentals.
Parlamentario Oduber ta spera cu e reunionnan di comision lo wordo yama a corto plaso, pa asina Parlamento por wordo informa con leu ta cu e trayecto di ley y pa ki dia nos por spera cu e ta wordo entrega.
