Directiva di Centro di Bario Playa Pabao ta anuncia cu e aña aki un biaha mas ta organisa nan famoso y tan spera “Plan Vacacional” di luna di oktober. E actividad ta tuma lugar na Centro di Bario Playa Pabao cu un duracion di un siman, cuminsando 13 di oktober y terminando 17 di oktober. E programa ta di dialuna pa diabierna di 8’or am pa 12’or pm. Nos Plan Vacacional ta specificamente pa muchanan entre 4 y 12 aña. A riba peticion di e muchanan por dicidi pa acepta mucha te na e edad pa 15 aña. Durante e siman aki ta bay tin actividad cu ta tuma luga na Centro mes y tambe lo bishita diferente luga manera un roundtrip pariba di brug, deporte, arte den bario y hopi actividad mas. Tambe tin weganan recreativo pa tur mucha tanto paden como pafo. Manera tur aña e ultimo dia di e Plan Vacacional lo tin un anochi social na unda mayornan por gosa di un show cu presentacion di cada grupo.. Naturalmente por bin cambio ainda den e programa. Mayornan por inscribi nan yiu(nan) na Centro di Bario Playa Pabao di dialuna pa diabierna, mainta entre 8’or am y 12’or pm y atardi entre 2’or pm y 5’or pm. Nos Plan Vacacional tin un duracion di un siman y ta cobra e suma di 50 florin pa mucha cu ta inclui tur actividad y muchanan ta haña tur dia un sandwich cu juice. Pa motibo organisatorio e ultimo dia pa inscribi ta diabierna dia 11 di oktober. Si ainda tin cupo lo habri inscripcion dialuna mainta. Directiva di Centro di Bario Playa Pabao ta corda mayornan pa inscribi nan yiu (nan) na tempo pa asina evita cu e mucha ta bay riba lista di espera y ta hasi uso di e oportunidad pa desea nos muchanan di Playa Pabao y di Aruba en general un dushi vakantie. Pa mas informacion por pasa libremente durante orario di inscripcion of yama Centro di Bario Playa Pabao telefon 593-8470.
