Minister di Finansa, Asunto Economico y Sector Primario, mr. Geoffrey Wever, a reuni awe na Bestuurskantoor cu directora di Post Aruba N.V., señora Esther Gomes, y e Hunta di Comisario di Post Aruba N.V., caminda cu a entrega formalmente e cuentanan anual di e companía pa e periodonan 2016 te cu 2022.
Minister Wever a destaca cu e logro aki ta resultado di un trabou intenso y dedicacion constante di e directiva actual di Post Aruba N.V., e ekipo financiero, y e Hunta di Comisario, pa yega na un punto den cual e atraso financiero tabata por wordo soluciona.
“No ta un situacion ideal cu un entidad estatal tin un atraso asina grandi den su iaarrekeningnan, pero mi ta contento pa mira cu despues di un proceso di restructuracion, cu un directiva nobo y un Raad van Commisaris nobo, Post Aruba N.V. a logra entrega e prome batch di iaarrekeningnan atrasa,” Minister Wever a splica.
E minister a agrega cu e compromiso di Post Aruba N.V. pa entrega e iaarrekeningnan di 2023 y 2024 dentro di dos kwartal di e siguiente aña, ta un paso esencial pa sigura cu e companía estatal ta completamente al dia cu su estadonan financiero, manera cu ta rekeri pa tur entidad estatal.
“Como gobierno, nos ta exigi cu tur companianan estatal cumpli cu e mesun standard di transparencia y rindimento di cuenta. E ta un parti integral di nos maneho responsabel di finansa publico y di un gobernacion moderno,” Minister Wever a enfatisa.
Minister Wever tambe a recorda cu recientemente e gobierno a aproba e “Deelneming en Dividendbeleid” pa tur e entidadnan estatal, un paso cu ta fortifica e marco pa un maneho mas claro, eficiente y sostenibel di e companianan estatal.
“Nos kier manda un mensahe cla: transparencia y rindimento di cuenta no ta opcional. Mi ta felicita e directiva di Post Aruba N.V., e ekipo financiero y e Hunta di Comisario pa nan esfuerso y dedicacion pa pone e companía rib caminda di progreso y cumplimento,” Minister Wever a concluí.
