Tristesa a bati na nos porta dia 14 di Oktober 2025, mainta tempran, ora cu nos dushi y bunita Mama a pega sonjo profundo y wordo hiba den brasa di su bon Dios, su Creador di amor cu nunca a faye. Ayanan, unda no tin sufrimento ni dolor. Ayanan, rondona pa santonan y angelnan cu alegria, gozo ,paz y amor.
Dios su fieldad grandi tawata cu mi Mama semper den bon y den malo. Mi Mama su fe tawata den tur cos henter su bida largo di 89 anja. Nos ta asina bendiciona di tawata tin nos Mama cu nos henter nos bida di te cu awor, cu mi 68 anja di edad. Lady Ruth tawata bisa semper, tur hende ora e bay un entierro, cu, nos tur tin cu bay ayanan un dia y nos no sa ki dia, na unda y kon. Y awor e turno a toca mi bunita y dushi Mama. Mercedes Petronilia Bergen Tromp. Nos Mayo. Cu su nombernan di carino Chedy, Chely, Tia Chede, Merce y Mayo pa su nieto, nietanan, bisa nieto y bisa nietanan y amigonan cu a conose nos Mayo. Nos ta sinti hopi dolor na nos curason y segun e dianan ta yegando mas serca di e dia di entrega su curpa bek na Dios , su alma precioso cu ya ta serca bon Dios, nos ta sinya conforma nos mas y accepta e boluntad di nos bon Dios na tera como na shelo. Mama a bay sosega den e luna y e siman di nos Papa su di 93 cumpleanos. Diasabra dia 18 di Oktober nos tawata hunto den famia pa a demonstra na Papa, cu nos ta duna danki pa Papa su bida tambe awor cu mas amor cu e amor di su bida pa ya 72 anja no tey bandi dje mas fisicamente, pero awor den mente, alma y curason. Nos lo recorda nos Mama, wela, bisawela, suegra, ruman, tia, y bon bisinja pa tur, un bon amiga cu su bon consehonan den nos dianan nos dilanti y mas. Tristesa a bati na nos porta y na nos curason, pero nos ta sigui duna bon Dios danki pa tur cos den tur cos, manera nos Mama a sinya nos. Cu su cantica preferi : “Ma mi sabi den ken mi fe ta “ .Y e les mas grandi cu nos a sinja di Mama : Comparti cu bo prohimo, sharing and caring . E tawata e ehempel firme y bibo di esaki pa su 11 rumannan, e como e mayor a cuida, stima y duna tur locual e tawata por cu amor ! Nos, su 4 yiunan, Roy ,Ro ,Lucky y ami, Ruthy, y tur su nieto y nietanan, bisa nieto y bisa nietonan ta bisa Mama, Mayo, danki ! Pa semper den nos curason !
Nos ta tuma despedida di e curpa di Mama dia 25 di Oktober, Diasabra, mainta di 9 am pa 11 am na Royal Funeral Home. Nos ta gradicido pa su bida di 89 anja, yena cu su mesun lesnan y experiencianan y hopi bendicion, biahenan pa Hulanda, Canada , Merca y Venezuela y Corsouw tempo nan aya ora e curpa tawata duna y tur e islanan den Caribe cu nos a bay hunto riba crusero varios biaha. Su dushi momentonan di hunga domino den su team di damas anjanan pasa y sali campeon. Su dushi momentonan , cushinando cumindanan dushi crioyo mientras e tawata canta den cushina . Pero mas, su dushi momentonan di hari y conta chistenan, cosnan pret. Ta di mi Mama Lady Ruth a hereda esaki cu ela trese y presenta den su One woman show varios biaha. Mama tawata un persona alegre cu hopi fe. Danki Mama, pa tawata un bon esposa pa nos Papa y un bon Mama pa nos semper ! Nos lo no lubida Mama nunca !
Dios a duna, Dios a tuma. Drumi dushi Mama, sosega na paz den lus eterno .
