E ekipo di softball Yoyo’s Power a bira campeon di Copa Aruba 2025, un torneo cu a tuma luga na Kudawecha Ball Park pa mas di dos luna.
P/e victoria den e final, nan a gana Redkins 9-2. Nan a gana danki na un combinacion di velocidad y poder den nan ofensiva y un actuacion grandi di Elkis Chinchilla, kende a wordo eligi como e miho pitcher di e torneo.
Cu e campeonato aki, Yoyo’s Power ta mustra tur hende na Aruba e forsa cu nan tin, cual ta pone nan como un di e miho ekiponan di softball den e liganan riba e isla Caribense.
Cu un constelacion di strea, mayoria Venezolano, e ekipo a demostra e union y hermandad cu ta haci nan un famia… e famia Yoyo’s.
“E hungadonan aki a duna tur cos riba veld y tur cos ta danki na e training pisa pa varios siman pa logra e hazaña aki, kere cu tur cos ta posibel ora tur cos ta combina den un solo mision. E meta ta cumpli,” asina Yuri Bracho, fundado di Yoyo’s Power, a bisa.
“Nos ta cla caba pa cuminsa dia 24 di october, cual t’e diabierna aki, cu e Copa Navideño, cu aña pasa a scapa for di nos man,” Jose “Pipino” Lugo, un di e hungadornan principal di e ekipo, a declara.
Cu un fanaticada cu a bay cu nan den bon y den malo, Yoyo’s Power ta gana e weganan riba veld, pero for di e tribuna nan ta sinti un impulso cu ta pusha nan pa sigui haci cos bon y pa trece alegria pa nan fanatico.
