Pasobra E a libra nos di e poder di scuridad, y a traslada nos pa e reino di Su Yiu, stima, Den Kende nos tin redencion e pordon di pica nan.( Colosensenan 1:13).
Pakico hende ta stima scuridad asina tanto, pakico e reino di scuridad, ta wordo celebra, pakico permiti nos yuinan participa den scuridad, ora nos sa bon, cu scuridad ta haci nan malo, y despues ta nos ta keda cu e dolor di cabes.
Dios ta prohibi nos di atende cu scuridad, pasobra no tin ningun clase di bendicion, of crecemento ora nos ta participa den obranan di scuridad.
Aunke con bunita e wordo pinta toch e ta keda scuridad, y no tin ningun clase di beneficio, den dje.
Dia pa dia scuridad ta aumenta riba mundo y ta trece hunto cune tur clase di inmoralidad, perversidad, y falta di respet pa Dios y pa hende.
E ta presenta su mes den forma di wega, pa hende bisa cu ta wega, pero ta wega di diabolico.
Den ningun celebracion den cual e Spirito Santo di Dios ta , hende no ta nada atende cu scuridad, ni tampo disfrasa of makiya, pasobra Dios ta lus, y den dj’E no tin nada, nada di scuridad.
Antes bruheria tabata wordo pratica den casita scondi den mondi, pero awor aki bruheria ta wordo exponi grandemente, den teatro, den sala di reunion, y hopi ta permiti tur clase di bagamunderia drenta nan hogar, sin tene cuenta e poder di scuridad cu tin tras di tur e cosnan aki.
Pasobra Bo ta sende mi lampi,Senjor mi Dios, ta ilumina, mi scuridad. ( Salmo 18:28).
Bo palabra ta un lampi pa mi pia y un lus pa mi caminda.( Salmo 119:105).
Si nos bisa cu nos tin comunion cun’E y nos ta cana den scuridad, nos ta ganja y no ta practica e berdad. Ma si nos ta cana den lus manera E mes ta den lus, nos tin comunion cu otro y e sanger di Hesus, Su Yiu a limpia nos di tur pica.(1 Juan 1:5-7).
Hesus a bisa, Ami ta e lus di mundo, esun cu sigi Mi lo no cana den scuridad, ma lo tin e lus di bida.(Juan 8:12).
Mi a bini como lus den mundo,pa tur esnan cu kere den Mi, no keda den scuridad.( Juan 12;46).
Pasobra Bo a libra mi alma for di morto, di berdad, bo a warda mi pianan pa mi trompica, asina cu mi por cana dilanti di Dios, de e lus di bida.( Salmo 56;13).
Nos no ta yama pa cana den scuridad, ni tampoco mescla nos mes cu ningun clase di scuridad, e palabra di Dios ta mustra cu nos tin abstene nos mes for di tur obra di scuridad, y perservera pa nos cana den e lus di Senjor.
No participa den obranan infructifero di scuridad, sino mas bien expone nan. ( Efesionan 5:11).
No habri porta pa diabel drenta den bo cas, keda leu for di idolatria, y cosnan cu bo no conoce, keda leu for di ocultismo y tur obra di scuridad.
Nos ta bibando den tempo trabahoso , pero nos bista tin cu keda fiha riba nos Senjor y Salbador, pa asina nos por evita tur distraicion, pasobra ta hopi cos ta biniendo pa e mundo aki, pa asina pone hende trompica. Nos mester keda firme e fiel na nos Senjor.
No stima mundo ni e cosnan cu tin den mundo, si un hende stima mundo, e amor di e Tata no ta den dje.( 1 Juan 2:15).
Sinceramente, Pastor Marcel Balootje
