Biblioteca Nacional Aruba ta den siman di Festival di Buki pa Mucha. Diferente autor ta bishita scol pa conta storia y duna un presentacion. Tin actividad atardi tambe na biblioteca y tur mucha ta bon bini. Tur presentacion ta gratis cu e meta pa stimula mucha pa lesa. Denise de Jongh-Rekwest a regala Biblioteca hubenil su buki ‘No kere mes!. Un buki cu aventura den naturalesa pa tur mucha y na Papiamentu. Ban den naturalesa cu Mia y Lito. Ban wak parha den mondi.
Denise de Jongh-Rekwest a nase na Kòrsou i ta biba pa basta aña na Boneiru. Denise ta kasá ku un boneriano. Nan tin un yu muhé, Kaylee, su inspirashon pa su seri di buki di Kaylee. Despues di studia i traha den turismo, el a lanta su propio negoshi di training & consultancy. E ta duna diferente training, entre otro di servisio, komunikashon, teambuilding i etikèt. E training di mas popular ta esun di etikèt.
Na aña 2008, Denise a skirbi i publiká su promé buki di etikèt pa mucha esta ‘Kaylee i su primunan ku fakansi na Kòrsou’.Tin kuater buki den e seri di Kaylee i dos luisterboek na Papiamentu i Hulandes.
Denise a skirbi i publiká te na 2025; 25 buki di su mes. Tambe el a publiká 25 buki pa diferente otro outor i instansia di Aruba, Boneiru, Kòrsou i Hulanda via Request Publishing, su propio editorial. Denise sa partisipá na e diferente siman di buki pa mucha na Aruba, Boneiru i Kòrsou.
E último buki ku Denise a skirbi i publiká na enkargo di SKAL ta ‘Kantika di tur tempu, pa semper’. E buki akí ta pa dokumentá i kontribuí na preservashon di letra- i melodia original, outéntiko di kantikanan oral folklóriko di Boneiru. E kantikanan original akí ta data for di tempu di sklabitut. Kada un tin su historia mará na dje i ta basá riba realidat. Pa siman di buki pa mucha, Denise lo presentá su buki nobo ‘NO KERE MES’ un buki ku yen di aventura. Banda di skirbi buki pa mucha, Denise ta gusta lesa buki, ‘birding’, fotografiá i pinta.
