Diabierna mainta e dos agentenan di Polis, M.V. y R.D. ta presenta dilanti Hues pa e lamentable caso di a tira mata e hoben J.F. Lanoy.
SOLO DI PUEBLO por a compronde cu e dos agentenan di Polis ta suspendi, pendiente di e caso penal aki.
TIRA MATA HOBEN
Ambos agente di Polis ta wordo acusa cu riba 9 Februari 2025 a mata e hoben J.F. Lanoy. Segun e acusacion, intencionalmente M.V. y R.D. a los varios tiro cu nan arma di Polis riba Lanoy y su vehiculo, cu consecuencia lamentable cu Lanoy a fayece.
AGENTENAN SUSPENDI
Ta asina cu e agentenan M.V. y R.D. ta suspendi pa cu e investigacionnan cu a tuma lugar y tambe pendiente resultado di e caso penal cu Ministerio Publico a dicidi di cuminsa contra nan.
CASO REGIE
Informacion cu ta dispone di dje ta mustra cu Diabierna no ta bay tin tratamento di e caso completo. E ta un asina yama “regie zitting”, caminda Fiscal lo presenta e acusacionnan y despues e abogadonan lo por haci nan peticion na Hues, si nan ta desea di mas investigacion. Fiscal lo tin chens di reacciona y finalmente Hues lo tuma un decision riba e peticionnan y tambe lo fiha un dia pa tratamento di e caso.
