Docente di musica Carlos Bislip a celebra e logro di e apertura di Porta pa Harmonia den Semeleerstraat. Como director di Arubaanse Muziekschool (AMS), el a comparti cu 40 aña pasa ora el a bolbe Aruba, Minister Herdé a expresa cu scol di musica no mester solamente funciona na Cas di Cultura den Playa pero mester bay den pueblo. Na es momento Sr. Bislip no a compronde esaki pero den transcurso di e añanan e la compronde e dificultad di varios hoben pa yega te na Cas di Cultura.
Di e forma aki el a expresa su emocion y alegria cu e logro di e prome scol di muisca na Aruba den pueblo di Noord. E director di AMS a indica cu lo cuminsa cu les di piano, baho, guitara, cuarta y mandolin na Porta pa Harmonia y dependiente di deseo di e alumnonan tin e posibilidad pa eventualmente añadi diferente otro instrumento n’e scol aki. Tin diferente forma di recreo cu ta importante pa desaroyo di ser humano y di e forma aki Porta pa Harmonia ta e prome paso pa desaroyo di mucha y hoben den forma di musica. Porta pa Harmonia a habri fin di siman ultimo y pronto lo anuncia inscripcion pa les di musica n’e scol situa na Semeleerstraat. Un idea cu a nace durante un accion di bario den Semeleerstraat, na momento cu Prome Minister mr. Mike Eman a mira un cas bashi y a surgi un idea pa dun’e cas aki un proposito. Arubaanse Muziekschool (AMS) a brasa e idea aki y Fundacion Cas pa Comunidad Arubano (FCCA) a duna tur cooperacion pa renoba e cas y ta dispuesto pa mira unda lo por coopera den mas bario pa tuma iniciativa similar. Un proyecto cu hopi sentimento, unda cu Prome Minister mr. Mike Eman conhuntamente cu AMS kier ofrece comunidad un luz di speransa adicional unda tur hoben cu ta desea di desaroya un talento cu nan por tin den cualkier instrumento musical por bin aki y sigui e lesnan.
