Na Verano renobacion di casnan di pueblonan ta continua. Fundacion Cas Pa Comunidad Arubano (FCCA) tin algun contratista realisando varios trabou di mantencion necesario. Durante un Accion di Bario a combersa cu Christopher Duarte cu ta director di su mesun compania yama DUCOR. Pa algun tempo nan ta bezig ta haciendo diferente trabou di mantencion, remodelacion na varios vivienda social rond di nos isla. For di Yuwana Morto, Cura Cabay te na Verano, FCCA ta invirtiendo den mehora e calidad di bida di esnan cu ta huur vivienda social for di e instancia estableci na 1979.
E hoben empresario ta remarca cu tin necesidad pa trece mehora den diferente bario y ta contento pa mira cu gobierno pero tambe FCCA ta poniendo man na obra pa realisa esaki tambe. “Nos ta papia cu e bisiñanan, nos ta miranan contento; purbando di crea mehora den bario” Duarte a remarca.
Recientemente Prome Minister mr. Mike Eman a bishita Verano. Durante bishita a combersa cu varios ciudadano cu pa varios aña ta huur e casnan di FCCA den bario. Necesidad den Verano ta hopi; for di mehora den iluminacion publico, na falta di un accion di limpiesa den cura di algun cas, drempel pa automobilista baha velocidad y mas. For di inicio di Gabinete AVP-Futuro, Prome Minister ta bishita e barionan. Luna pasa Gabinete AVP-Futuro a anuncia un plan pa renoba y haci diferente mehora den bario cu cas social e.o. De Vuyst, Bushiri, Mabon y Cura Cabay Zuid. Ademas a inaugura un mini turf di futbol den bario di Madiki.
