Bobby Gibbs ta President di Stichting Asambeho Aruba, e ta comparti e importancia di musica asambeho den hoben ya cu e mes tabata toca asambeho desde su infancia. Na aña 1980 e ritmo di musica aki tabata wordo yama ‘brass band’ y desde prome cu esaki Bobby tabata toca y envolvi den e cultura di e ritmo aki, cu despues a haya e nomber asambeho.
Despues di a termina MTS na Aruba, Bobby a bay studia na Corsou, caminda a bira un di e promenan cu a introduci e prome banda di asambeho na Corsou, bou di e nomber ‘Brass Evolution’ y despues a hiba e ritmo di asambeho rond den Hulanda tambe. Antes e tabata hopi mas dicifil pa yega n’e instrumentonan y tambe pa tin e finansa pa bay un scol di musica. Tempo cu Bobby y su grupo a cuminsa toca e ritmo di asambeho nan a haci uzo di varios drum y diferente instrumento cu nan a recauda te ora nan a logra forma un banda.
Esaki ta refleha e necesidad di tin un scol di musica den bario y ta demostra cu e iniciativa aki ta uno importante y ta cuadra cu locual e Stichting Asambeho Aruba a cuminsa introduci na diferente centro di bario. Durante vakantie grandi, e fundacion a tene e prome drum camp pa mucha entre 8 cu 10 aña na YMCA San Nicolas y e di dos camp a continua na Centro di Bario Brazil. Di e forma aki nan lo tene diferente drum camps na varios Centro di Bario y ta aplaudi e inciativa di Gobierno pa trece accesibilidad di musica pa hoben den e barionan.
Porta pa Harmonia a habri den fin di siman ultimo y pronto lo anuncia inscripcion pa les di musica n’e scol situa na Semeleerstraat. Un idea cu a nace durante un accion di bario den Semeleerstraat, na momento cu Prome Minister mr. Mike Eman a mira un cas bashi y a surgi un idea pa dun’e cas aki un proposito. Arubaanse Muziekschool (AMS) a brasa e idea aki y Fundacion Cas pa Comunidad Arubano (FCCA) a duna tur cooperacion pa renoba e cas y ta dispuesto pa mira unda lo por coopera den mas bario pa tuma iniciativa similar. Un proyecto cu hopi sentimento, unda cu Prome Minister mr. Mike Eman conhuntamente cu AMS kier ofrece comunidad un luz di speransa adicional, unda tur hoben cu ta desea di desaroya un talento cu nan por tin den cualkier instrumento musical por bin aki y sigui e lesnan.
