Minister di Deporte, mr. Gerlien Croes, ta anuncia cu e trabou di instalacion di iluminacion na veld di Nacional a keda culmina exitosamente y e proyecto a wordo entrega oficialmente diasabra ultimo, 1 di november.
E instalacion di luz na veld di Nacional ta forma parti di e proyecto di iluminacion cu Lotto pa Deporte ta financia, y cu ta dirigi pa mehora infrastructura deportivo na Aruba. E proyecto ta busca pa crea espacionan sigur, accesibel y funcional pa entrenamento y competencia.
Minister Gerlien Croes a expresa su satisfaccion cu e resultado di e trabou y a gradici e ekipo tecnico y partnernan cu a contribui pa logra e meta aki.
“E entrega di e iluminacion na veld di Nacional ta otro paso den e vision pa un infrastructura deportivo moderno y digno pa nos atleta y comunidad. Iluminacion no ta solamente luz; ta simbolo di progreso, di union y di compromiso continuo pa deporte na Aruba”, Minister Gerlien Croes a enfatisa.
E proyecto ta parti di un plan di diferente fase cu ya a inclui instalacion di luz na otro veldnan deportivo riba e isla, y ta contempla mas trabou den futuro, proximamente na veld di RCA y Riverplate. Minister Gerlien Croes a conclui cu un yamada na comunidad deportivo pa sigui cuida y usa e espacionan debidamente, pa asina e infrastructura por sigui sirbi generacionnan presente y futuro.
