Dia 27 di oktober 2025 13 sinidicato a presenta nan posicion pa loke ta trata rijkswet HOFA. Despues di a repasa esaki ami sigur ta sostene e sindicatonan den nan posicion fiha y argumentonan presenta.
Na mi opinion sindicatonan ta un di e stakeholdernan mas importante. Nan ta representa nos clase trahador den sector priva, nan ta representa nos ambtenaarnan, nan ta representa nos comunidad. Nan ta un partner social obligatorio y nan a presenta un posicion bon argumenta y cu un peticion cla na Gobierno y Parlamento.
Durante reunion publico mi a enfatisa cu Gobierno di Aruba ta sordo mudo pa cu nos sindicatonan. Cual sigur ta un insulto na un pilar di nos democracia social! Kico nan ta bisando e trahador cu e sindicatonan aki ta representa? Cu nan preocupacion no ta importante? Cu e posicion fiha pa nan representantenan no tin balor?
Pasobra realidad ta cu despues di 2 siman di a ricibi e carta di sindicatonan, ainda gobierno no tabatin e decencia pa yamanan pa un reunion.
Kico nos ta bisa e clase trahador ora cu nos tin un minister Gerlien Croes cu durante un reunion cu algun sindicato, tratando un otro topico, segun nan propio palabra Minister Croes a demostra na nan cu e ta rabia cu e carta cu nan a manda over RW Hofa y ta bisanan cu ta mihor pa nan rectifica.
Ta ki manera esaki ta pa trata sindicatonan, cuestionando nan inteligencia, anto sin tin e decencia pa invita nan pa un reunion pa asina mediante un dialogo atende cu nan argumentonan, purba di cambia nan opinion y djey haci e peticion di rectificacion.
Mi ta condena cu Gobierno no ta tuma sindicatonan na serio! Pasobra lagami bisa bon cla: Niun ley cu ta afecta nos pais asina profundamente mag pasa sin e sosten y e input di nos partnernan social, gremionan comercial y sigur e trayecto no por a keda inicia sin e consensus di Parlamento manera RvS y e plataforma di IPKO ta indica.
Pueblo ta spera cu na tur momento nos ta cla pa defende y representanan. Y pa haci esaki tin ora ta rekeri di hopi curashi. Un curashi cu MEP ta demostrando riba e topico aki, un curashi cu PPA tambe ta demostrando, un curashi cu De Meza di AVP a sa di demostra, un curashi cu sindicatonan a demostra presentando nan posicion fecha 27 di oktober 2025 y un curashi cu mas cu 10000 cuidadano a demostra door di firma contra RW Hofa. Lastimamente gobierno no tin oido y ta sigui cu e proceso como si nada, sordo y mudo.
Mi posicion ta cla: Ami ta contra e Rijkswet HOFA y mi ta condena e proceso encamina pa gobierno AVP Futuro. Pero na mes momento mi ta carga e speransa cu ainda nos por yega na otro. Como parlamentario ami sigur ta reacciona positivamente na e yamada di sindicatonan pa gobierno y parlamento uni y sali papia un solo voz, un voz na fabor di trato igual, basa riba confiansa y respet pa e derecho di un pueblo. Mi ta di acuerdo cu sindicatonan cu tanten cu institucionnan local ta funciona, y e cifranan ta demostra cumplimento, no ta existi ningun necesidad huridico ni economico pa introduci e ultimo recurso di un ley di Reino. Ban traha pa yega na un mihor deal pa ARUBA, mediante modernisacion di nos LAft of via por ehempel un onderlinge regeling. Ban scoge pa e caminda corecto, ban scoge pa Aruba su autonomia y derecho di autodeterminacion. Mas cu tur cos pa traha pa elemina cualkier supervision, pasobra nos mes por!
