Porta pa Harmonia ta anuncia su prome tayer y ta brinda e oportunidad pa tur hoben cu ta desea di explora nan talento den musica. Porta pa Harmonia a habri y ta invita tur hoben cu kier forma parti di e prome grupo di studiante di musica, pa tuma contacto y inscribi mesora mirando cu esaki ta completamente gratis.
Apenas algun dia atras a tuma luga e inuaguracion oficial di e scol di musica den bario di Noord. E ta hiba e nomber di Porta pa Harmonia, caminda diferente docente di musica lo yega hunto pa asina brinda nan conocemento na e hobennan cu ta desea di destaca den mundo musical.
E scol ta completamente gratis y ta brinda e oportnuidad na cada mucha cu semper a anhela di por a siña toca un instrument, logra cumpli e soña aki. Na mes momento a anuncia e prome tayer cu lo inicia dia 24 di november venidero.
Tayer di Dande lo brinda e chens pa siña ritmo, melodia y e traadicion bunita di Dande. Inscripcion ta habri caba, por tuma contacto via whatsapp: 699-5144. Tambe via email: portapaharmonia@gmail.com
Esaki ta momento pa demostra y sostene tanto nos musica local, pero tambe e union den bario. Esaki ta un bunita oportunidad pa yega hunto y trece alegria y hermandad den forma di musica. Scol di Musica ta duna e hoben e empuhe cu e mester pa realisa su talento. Ban laga musica di Dande resona den Semeleerstraat. Inscribi awe mes!
Tocante Porta pa Harmonia:
Porta pa Harmonia ta un scol di musica pa e comunidad di Noord. Porta pa Harmonia ta un proyecto cu Gobierno a desaroya hunto cu Muziekschool y FCCA. Durante di bishita den bario, e habitantenan a vocifera nan deseonan pa mehora nan bario. A mira e necesidad pa trece actividad y facilidadnan den bario pa duna un empuhe positivo y constructivo na e ambiente den cada bario.
Un scol di musica den e bario di Monserat, tabata hustamente pa duna e hobennan y adultonan, e oportunidad pa siña toca un instrumento y desaroya nan mes musicalmente. E proyecto aki lo sirbi e hobennan di e bario bon y tin como meta pa yuda wanta e hobennan for di caya.
“Un hoben cu ta ocupa, no ta busca malo pa haci. Esaki ta crea un efecto positivo pa e pais henter,”. Musica ta un herment poderoso cu ta influencia tur aspecto di bida di un ser humano. E no ta solamente forma talento, pero ta eleva cultura di nos isla.
“E Porta pa Harmonia” tin multiple nificacion: E “Porta” ta duna e mensahe cu e portanan di e scol di musica aki realmente ta habri pa comunidad y ta e porta habri pa oportunidad pa esnan cu kier siña toca un of mas instrumento of desaroya nan habilidadnan musical. Ademas e palabra “Harmonia” ta conecta automaticamente cu musica, pero tambe ta refleha e meta di gobierno pa trece union y harmonia den bario.
E idea pa e proyecto a nace durante un bishita reciente di Prome Minister Mike Eman den bario, ora cu su bista a cay riba e parcela y e necesidad pa mas union den comunidad a bira cla. E momento ey mes a planta e simia pa un idea cu awe ta bira realidad. E Porta pa Harmonia ta mas cu solamente un scol di musica, e ta un simbolo di speransa, union y progreso.
