E tension militar entre Merca y Venezuela ta sigui escala den nos region y Parlamentario Eduard Pieters ta pidi pa Parlamento di Aruba tuma su rol serio, neutral y responsabel. Segun informacion publica diabierna ultimo, Presidente Donald Trump a duna ordo pa intensifica den un Operacion Militar yama Southern Spear, un maniobra militar cu ta sosode literalmente dilanti nos costa. Pa Pieters, e desaroyo aki ta un motibo di urgencia pa convoca un encuentro ‘porta sera’ hunto cu Minister Presidente, Mike Eman, cu ta encarga cu asuntonan general y di Reino y asina pone tur parlamentario na altura di e risico-, consecuencia- y pasonan cu gobierno di Aruba mester considera y evalua.
Preocupacion politico
E situacion den nos region no ta algo nobo. E tension politico militar entre Merca y Venezuela ta acumulando durante e temponan aki, pero cu e operacion militar intensifica aki, Aruba cu ta fisicamente hopi cerca y ta depende economicamente di Merca y ta forma parti di Reino Hulandes, por drenta den un fase hopi sensitivo. Pieters ta indica cu ta fundamental pa e representantenan di pueblo haya informacion directo, comprensivo y na tempo, pa por evalua ki medida Aruba mester tuma, kico por afecta nos siguridad, nos aeropuerto, nos hafnan y nos poblacion.
Den luna di september, ex-parlamentario Otmar Oduber a pidi un senioren convent specifico riba e mesun topico aki. Fraccion di PPA ta lamenta cu te dia di awe, no a ricibi niun tipo di contesta di Presidente di Parlamento. Pa Pieters, esaki ta mustra un patronchi di falta di respet pa e derechonan parlamentario y falta di seriedad con ta maneha e asuntonan di siguridad nacional.
Yamada pa responsabilidad y neutralidad
Pieters ta haci un apelacion na presidente di Parlamento pa e keda eherce su cargo y actua neutral, profesional y na servicio di tur fraccion, no solamente di gobierno. “Den e momentonan asina delicado, nos mester informacion, discusion y planificacion. Siguridad di Aruba no ta un topico partidista; ta un obligacion comun di tur cu ta representa pueblo,” Pieters a bisa.
El a enfatisa cu un besloten bijeenkomst no ta un luho pero un necesidad. Ta asina so por haya informacion sensibel, analisa e scenario y forma un posision responsabel y unifica riba un tema cu por tin impacto positivo directo riba nos isla.
Parlamentario Eduard Pieters ta spera cu e biaha aki, fraccion PPA haya e respet y oido. “Nos ta trahando pa bienestar general di pueblo di Aruba, pa protega nos stabilidad y pa prepara pa cualkier posibel paso cu mester tuma. E situacion ta serio, e riesgo ta real y e responsabilidad ta grandi. Parlamento no por keda keto: nos mester tuma liderazgo.”
