Durante reunion di Parlamento dialuna ultimo, mientras a trata e Cuentanan Anual 2019, parlamentario Carlos Bermudez a lansa atakenan hopi baho y sin base, na profesionalnan di gobierno cu no ta den sala pa defende nan mes.
El’a referi na e hecho cu 7 aña largo el a purba haña promocion pero no a logra. Y a insinua cu e departamentonan ta practica politica y ta dicidi ken nan ta yuda y ken no. Esaki ta un acusacion incorecto.
Ta hopi “unprofessional” pa un parlamentario cu tambe ta un empleado publico, lansa atakenan di e indole aki contra profesionalnan. Probablemente e mester pone e spiel su dilanti pa mira si acaso e mes como empleado publico, y mes momento politico activo riba lista di AVP, tabata privilegia e gobierno di AVP. Pero pa e bay tilda otro profesionalnan di ta practica politica, sin cu e tin ningun base pa esey, ta di condena.
E ta un berguensa cu un profesional por baha su mes na un nivel asina baho. Fraccion di MEP ta lamenta esey, y ta di opinion cu e parlamentario y Fraccion di AVP mester pidi disculpa na tur profesional trahando den gobierno pa e atakenan falso y sin base.
