Na juni 2022 Aruba a introduci un maximo riba salario di directornan di entidadnan di gobierno, na un maximo di 329 mil florin. Ta trata aki di 11 director. Gabinete AVPFuturo sinembargo a publica un excepcion cu ta conta exclusivamente pa un director nobo na AAA riba peticion di Schipholgroep. Esaki tabata un decision cu a sorprende fraccion di MEP, pasobra un biaha mas gobierno AVPFuturo ta pasa tras di lomba di Parlamento sin informa pa dicidi riba un cambio di un ley cu Parlamento a aproba na 2022.
Minister Geoffrey Wever e siman aki durante un reunion riba un otro topico a hañ’e obliga di duna cierto informacion, y a informa cu ya desde april 2025 gobierno AVPFuturo a firma cu Schiphol, cu pa nan e maximo di salario di 329 mil NO ta aplicabel, y a aproba pa e director nobo di AAA gana un salario di 1.1 miyon florin.
E minister a informa tambe cu na september 2025, 5 luna despues, e a corda cu tin mas director cu solamente Schiphol y a pidi pa cuminsa revisa e ley pa demas directornan, pero e proceso aki lo tarda.
Remarcabel ta cu ya den november e decreto oficial pa e excepcion di AAA / Schiphol ta cla, pa un director no local cu si por gana 1.1 miyon florin, pero no tin miras ki tempo e situacion lo wordo coregi pa demas director y companianan.
Esaki ta un inhusticia pasobra mientras e director di AAA/Schiphol no a ni wordo apunta ainda, e demas 10 otro directornan LOCAL ya caba mester a entrega nan salario, y nan trahadornan tambe. NAN tin mas urgencia cu e director di AAA cu ni a yega Aruba ainda.
Esey ta inhusto, y den e inhusticia aki no ta relevante KEN ta paga e salario. Cada cen of cada miyon mas cu bo paga Schiphol, ta miyon menos cu por bay na gobierno pa yuda nos mamanan soltero, pensionadonan, y nos hobennan
P’esey e Fraccion di MEP a presenta un mocion, pa coregi e inhusticia di e gobierno aki den e decreto oficial. Si tin excepcion pa un, mester tin excepcion pa tur. Lamentabelmente fraccionnan di AVP y Futuro a vota CONTRA e mocion, y ta scohe pa no elimina e inhusticia.
Fraccion di MEP no ta laga e cos te aki. Fraccion di MEP lo reuni cu tur e representante di e entidadnan estatal, y lo haci tur esfuerso posibel pa elimina e inhusticia. No ta husto cu ta duna personanan cu no ta local privilegionan y ta nenga directornan local esaki. Ta obvio un biaha mas cu AVP y Futuro ta CONTRA nos hendenan local
