Yerba ta seca, flor ta marchita, ma e palabra di Dios, ta permanece pa semper. ( Isaias 40:8).
Si boso stima Mi, boso lo warda Mi mandamentonan.( Juan 14:15).
Ma busca prome e reino di Dios, y Su husticia y tur e cosnan aki lo wordo anjadi na boso.( Mateo 6:33)
Si bo mester di un consehero den bo bida, busca un hende cu tin temor di Dios, cu ta duna un testimonio cu su bida cu e tin Dios na prome lugar den su bida.
Pasobra na conseho cu un hende ta duna bo persona, bo ta sa si e persona, ta respeta Dios, y ta respeta bo persona.
Un hende cu ta respeta Dios, y ta respeta bo persona, nunca por dunabo un conseho cu ta rebaha bo personalidad , por ehempel e ta bisa bo pa bisti indecente, pa droga, pa bebe, pa haci cosnan cu ta completamente for di boluntad di Dios.
Imagina bo un amigo cu ta invita bo pa sali, e ta casa, y bo tambe ta casa, pero e ta bin busca bo cu dos muher den auto, pa boso bay parandia cune, awel e persona ey no ta bo amigo, ni tampoco ta respeta bo bida matrimonial.
Fieldad na Dios ta haci hende fuerte, pasobra Dios conoce esnan cu ta fiel, y ta door di oracion, ayuno, lesamento di e palabra di Dios y prueba nos ta bira fiel, pasobra pa Dios sa cu bo ta fiel e ta manda prueba pa bo, si bo ta corre bay for di Dios, bo no ta fiel pasobra, prueba ta hala hende mas serca Dios.
Den e buki di Santiago of Jacobo ta para scirbi e dos tipo di sabiduria, esun di mundo y esun di ariba cu ta bini di Dios, pasobra nos tur mester di sabiduria, pero nos tin di wak bon cual di nan nos ta aplica den nos bida.
Santiago 3: 13-18 ta para scirbi: Ken entre boso ta sabi y huisioso? Laga e mustra door di su bon conducta, su obranan den suavidad di sabiduria. Un hende sabi tin bon conducta cual e por demostra .
Ma si boso tin envidia amargo y egoismo den boso curason,no sea arogante,y asina ganja contra e berdad.
E sabiduria aki no ta esun cu ta baha bini for di ariba, ma e ta terenal,natural,diabolico. Pasobra caminda ta existi envidia y egoismo tin desorden y tur sorto di cos malo.
Wak bon serca ken bo ta tuma conseho, no ta pasobra bo mira un hende ta trata un otro malo, pesey bo tambe tin cu trata e persona malo, pasobra nunca bo no sa si e trato ey ta bay asina pa motibo di envidia y egoismo.
1 Juan 1:8-9 : Si nos bisa cu nos no tin pica,nos ta ganja nos mes, y e berdad no ta den nos.
Si nos confesa nos picanan, E ta fiel y husto di pordona nos, nos picanan y limpia nos di tur inhusticia.
Laga nos tene firme, na e confiansa di nos speransa, sin vasila,pasobra Esun cu a priminti,ta fiel.
Fieldad den famia, fieldad den matrimonio, fieldad na trabao, fieldad den nos sirbishi na Dios, tur ta bini di ariba, pasobra Dios ta fiel, y Dios ta lus y den dj’E no tin nada, nada di scuridad.
Si nos ta infiel, E ta keda fiel, pasobra E no por nenga Su mes. ( 2 Timoteo 2:13).
Ora nos ta fiel, y disponibel pa wordo husa door di Dios, cosnan grandi lo sosode den nos bida.
Ta momento pa nos biba fiel.
Sinceramente Pastor Marcel Balootje
