E Universidatnan di Aruba, Corsou y Sint Maarten a anuncia un iniciativa conhunto pa fomenta emprendemento y impulsa inovacion denter di e contextonan social, ecologico y economico unico di nan comunidadnan.
E colaboracion tin sosten di un subvencion di €150.000 for di Representacion di Hulanda na Aruba, Corsou y Sint Maarten. Representante di Hulanda, Gerbert Kunst a bisa: “Despues di a sirbi anteriormente como Consul General na San Francisco (2016-2020), mi tin hopi interes pa sigui traha ariba e ‘best practices’ (miho practicanan) di Silicon Valley. Ta excitante cu tur tres Universidad den e parti Caribense di Reino ta habri pa profundisa educacion den emprendemento pa fomenta e siguiente generacion di exito di ‘startups’ Caribense.”
Na curason di e asociacion aki tin e Kingdom Startup Program, cu ‘Hubs’ na Aruba, Corsou y Sint Maarten cu lo sirbi como pianan angular pa ecosistemanan di inovacion sostenibel den henter e parti Caribense di Reino Hulandes.
Via e Programa aki, studiantenan, fundadornan academico ambicioso y ‘changemakers’ emergente lo ricibi entrenamento practico (‘hands-on’) den metodologianan contemporaneo di emprendemento y inovacion. Participantenan lo traha estrechamente cu gobiernonan, socionan den sector priva y organisacionnan di sociedad civil pa co-crea solucionnan practico pa retonan social y economico urgente.
Proyecto piloto conhunto na Aruba E implementacion piloto di e Programa ta programa pa tuma luga na Aruba, den zomer di 2026, cu participacion adicional di delegacionnan di studiante representando Corsou y Sint Maarten. E piloto aki ta pone e base pa integracion a largo plaso di educacion empresarial, intercambio di conocemento y construccion di capacidad di inovacion ariba e tres islanan. Un Demo Day final ta premira na tur tres Hub durante e vakantie di zomer di 2026, unda ekiponan di Aruba, Corsou y Sint Maarten lo presenta e resultadonan y comparti experencia.
E Programa ta busca pa fortalese resiliencia economico di e islanan, construi capacidad local y reforsa sectornan di inovacion mientras ta profundisa colaboracion denter di Reino Hulandes.
“Nos ta entusiasma pa cuminsa desaroya un curriculo di emprendemento multidisciplinario—uno cu ta cende e interes di studiante den creacion y inovacion, funda den e contexto local di Aruba. A traves di e iniciativa aki, nos meta ta pa fortalese y contribui na e ecosistema empresarial na Aruba y crea un plataforma unda studiante por explora, experimenta y trece nan ideanan na bida, tanto denter como pafo di klas.” – Sue-Ann Lee, Rector di Universidad di Aruba
“Mientras nos ta busca pa brasa e asina yama ‘Orange Economy’, of industrianan creativo, University of St. Martin ta reconoce cu solamente via colaboracion cu nos partners den Reino, nos por establece un ecosistema duradero pa nos emprendedornan local. A bira evidente cu universidadnan ta central den cualkier proyecto cu ta sostene inovacion y desaroyo socio-economico pa nos islanan.” – Antonio Carmona Báez, Presidente di University of St. Martin y Profesor di Relacionnan Internacional y Desaroyo.
“Nos lo uza e fondo aki pa stimula studiante pa explora iniciativanan den area di desaroyo sostenibel y tecnologia, y descubri nan talentonan comercial.” – Stella van Rijn, Rector Magnificus di University of Curacao.
“E colaboracion aki ta trata di forma un futuro comparti,” asina Michael Dooijes, fundador di StartAruba y lider strategico di Kingdom Startup Program (KSP) a bisa. “Door di conecta e tres universidadnan aki, (aspirante) emprendedornan, y fortalese ecosistemanan, nos ta convirtiendo e parti Caribense di Reino den un plataforma di lansa (‘launchpad’) pa inovacion cu ta ancra localmente pero conecta globalmente.”
Siguiente pasonan: E universidadnan y nan socionan lo finalisa structura di e programa na inceiro di 2026, cu reclutamento di ekiponan di studiante y mentornan cuminsando den e semester di primavera. Un evento publico di anuncio y campaña visual lo sigui pa destaca e universidadnan participante, socionan y oportunidadnan pa colaboracion.
Keda pendiente – mas detaye tocante e edicion di zomer 2026, oportunidadnan di asociacion y e prome gruponan di studiante lo wordo anuncia pronto. Temponan excitante ta na caminda pa e prome generacion di inovadornan di Caribe Hulandes.
Mas informacion: michael@futurestreet.nl
