Miembronan di Parlamento di Aruba a representa nos isla dignamente durante e bishita oficial na Parlamento Latinoamericano (Parlatino) siman pasa. Entre nan tabata Parlamentario Dennerich Kelly, kende den un sesion clave a trece un perspectiva fresco, critico y necesario riba un tema cu ta crece den importancia mundial: tecnologia aeroespacial y su impacto riba desaroyo agricola, economia y siguridad nacional.
Diahuebs mainta, cuater parlamentario di Aruba a asisti reunion di e Comision di Asuntonan Economico, Debe Social y Desaroyo Regional di Parlatino. E sesion tabata dirigi temporalmente door di e representante di Aruba, Sr. John Hart. Durante e encuentro, Dr. Acosta di Brasil a duna un presentacion profundamente ilustrativo tocante “Tecnologia Aeroespacial pa Desaroyo Agricula y Economico”.
Den su splicacion, el a mustra con satelitenan, dronenan y sistema di remote sensing ta sirbi como hermentnan moderno pa detecta secura, evalua falta di awa y calidad di solo, y pa optimalisa produccion agricola. E tecnologia tambe ta duna claridad riba e manera con por uza tera mas eficiente y, mescos, proteha recurso natural mientras ta stimula un desaroyo sostenibel y transparente.
Na final di presentacion, Sr. Dennerich Kelly a tuma palabra cu dos pregunta esencial cu a pone Aruba den centro di un discusion crucial pa paisnan chikito. Kelly a expresa cu e uzo di tecnologia aeroespacial tin potencial pa trece gran progreso pa sector agricola y pa economia di Aruba, pero a adverti cu mescos e tecnologia por presenta riesgo serio si no tin un marco di proteccion adecuado.
El a bisa cu, pa Aruba, ta fundamental pa compronde si paisnan grandi manera Brasil tin un tipo di acuerdo especial cu NASA, pa mira con un pais chikito por traha cu potencianan grandi sin compromete su mes siguridad. Tambe a surgi e cuestion vital: ken ta doño di data di satelite, un tema cu Kelly a relaciona directamente cu riesgo di abuso di informacion den un contexto geopolitico delicado, particularmente awor cu tin tension entre Venezuela y Merca, cu por tin impacto directo riba Aruba y e region Caribeño.
Den su discurso, Kelly a bisa cu si Aruba no tin ley fuerte pa proteha dato, regulacion cla riba posesion y uzo di imagen, y garantia di soberania nacional riba informacion sensitivo, tecnologia cu ta destina pa yuda por bira, en realidad, un menasa pa un pais chikito cu capacidad limita pa defende su mes.
Kelly a yama tambe pa un standard unifica den Caribe pa maneho y proteccion di datonan aeroespacial, insistiendo cu tur aliansa cu agencianan di espacio mester transparente, sigur y basa riba respeto mutuo. El a adverti cu informacion sensitivo ta algo cu por wordo mal uza den cualkier momento sin cu paisnan chikito ta prepara pa contraresta tal abuso, y p’esey proteccion mester keda centro di cualkier debate tecnologico.
Cu su intervencion firme, Dennerich Kelly a posiciona Aruba como un pais cu ta pensa adelanta, cu ta defende interesnan di su pueblo y cu ta busca innovacion sin sacrifica siguridad. E bishita na Parlatino a pone Aruba den mapa como un voz prepara, vigilante y comprometi cu un futuro mas sigur pa nos region.
