Anticipando e siguiente edicion di Ban Bek Caya “Black Friday Edition” cu ta tuma luga diabierna 28 di November, a acerca algun comerciante den Caya Betico Croes pa check si tur cos ta cla pa diabierna.
Comerciantenan ta cla, descuentonan y ofertanan special di Black Friday ta cla pa Aruba bin probecha di nan comprasnan den e ambiente unico di Ban Bek Caya.
Segun Joanette Vrutaal di Grupo Bennu cu ta opera Zara, Parfois, Mango y Aldo, a mira un positivismo desde inicio di aña caba di comerciantenan cu kier bolbe den caya grandi. Esaki ta un tendencia positivo cu lo brinda mas variedad y oferta cual lo atrae mas cliente den Caya Grandi.
Fadi Nice di Polo Club tin hopi confiansa y fe cu caya grandi lo bolbe florece, pero ta recorda cada hende si cu pa habri un negoshi den Caya Grandi, mester haci inversion. Ta pesey nan ta inverti y duna tur sosten posibel pa hunto cu otro comerciantenan, trece actividad comercial bek den caya.
E comportacion di clientenan no ta manera antes, unda nan tabata drenta Caya Grandi solamente pa cumpra pana of articulonan di cas. Clientenan ta busca e experencia completo cu ta inclui shopping, entretenimento y ofertanan culinario. Marksonn Maduro di Hoya y Apotek ta compara e experencia den area hotelero cu locual tin den Caya Grandi y ta haya e initiativa di Ban Bek Caya como e oportunidad pa rebiba comercio den Caya Grandi.
Amit Rawat, propietario di Tilted a indica cu “si bo tin e producto corecto, no ta importa unda bo ta, e cliente lo sa di hayabo.”
