Diaranson mainta, a tuma luga e celebracion special na Cas di Titi pa conmemora cu dies aña pasa, a haci e apertura oficial di e prome facilidad multi funcional na Aruba MFA.
Tabata na comienso di e Gabinete Mike Eman 1, cu Prome Minister Eman a mira e necesidad pa crea un edificio den cual comunidad por bin hunto den un centro y haci diferente deligencia bao un solo dak. E tempo ey, a pensa riba un facilidad den cual lo ubica HBK, un filial di Impuesto, Elmar, WEB, AZV y hasta un biblioteca pa trece e servicionan aki mas cerca di comunidad. Asina e surgi e plan pa crea un MFA den cada districto pero cu e tema y aspectonan cu ta identifica cada districto.
Pa e prome MFA, cual a bira esun di Noord, Arkitecto Orlando Hoevertsz a gana e destaho y a studia e districto di Noord pa identifica locual ta caracterisa Noord. A incorpora e elementonan aki den e diseño paradox. Di un banda e trece e identidad di e piscadonan di Noord den e interior di e edificio, caminda a haci uzo di hopi palo cu ta refleha e palonan di e piernan na Noord, pero tambe a crea e lama haciendo e vloer paden blauw. Di otro banda, a diseña un edificio completamente moderno y sostenibel cu bon isolacion y panel solar pa produci suficiente coriente pa e edificio su operacion diario. Asina Noord a haya su MFA ultra moderno pero cu e identidad di e districto bon defini den e interior.
Pa celebra e prome decada, diaranson mainta, acompaña pa invitadonan, Prome Minister Eman a duna un discurso den cual a gradici e ekipo cu tabata na cabes di e proyecto grandi aki na comienso di e vision di MFA, pero tambe Edwin Roos, Presidente di SOGA cu a financia e cuater MFAnan cu a keda traha. Ademas, a recorda con dies aña pasa a haci e apertura hunto cu Sra. Titi Tromp, baluarte di Noord, di locual a bira e facilidad cu ta brinda servicio na shete mil persona cada luna.
Edwin Roos den su discurso, a gradici Prome Minister pa e confiansa den SOGA pa por financia y mantene e edificionan aki y a comparti e motibo tambe pa cual e tempo ey no a logra construi MFA na San Nicolas. A opta e tempo ey pa mehora aun mas locual tabatin planea den e cuater MFAnan pa cual a haci uzo di e fondonan presupuesta pa MFA San Nicolas.
San Nicolas no ta keda sin su MFA y Prome Minister Eman a sigura tur presenta cu na comienso di 2026, lo inicia cu e di cinco MFA cual lo ta esun di San Nicolas y mas den futuro hasta MFA na Dakota.
